«Qostanaıda 147 bala qys boıy qamalyp otyr» - respýblıkalyq basylymdarǵa sholý

EQYU-nyń Іs basyndaǵy tóraǵasy, Qazaqstan Respýblı­ka­synyń Memlekettik hatshysy - Syrtqy ister mınıstri Qanat Saý­da­baevtyń Qytaı Halyq Respýblı­ka­sy­na resmı sapary bastaldy. Qanat Saýdabaev saparynyń alǵashqy kúni QHR Memlekettik Keńesiniń Tóraǵasy Ven Tszıabaomen, Syrtqy ister mınıstri ıAn Tszechımen kezdesýler ótkizdi. Qazaq jurty men Aspanasty eli arasyndaǵy qarym-qatynastyń egjeı-tegjeıin «Egemen Qazaqstan» basylymynyń búgingi sanyndaǵy «Tamyry tereń yqpaldastyq taǵylymy» degen atpen berilgen maqaladan oqı alasyzdar.

Qazaǵyn oıatyp, qalǵytpaǵan Alash arysy arýaǵyn ardaqtaýǵa baılanysty atqarylatyn is áli aýqymdy. Bıylǵy jyl rýhanı ýyzdy da mol máıekti jyl bolǵaly tur. «Paryz ben qaryz» osy taqyryppen jaryq kórgen «Egemen Qazaqstan» gazetindegi kelesi maqala Mirjaqyp Dýlatovtyń 125 jyldyq mereıtoıyna oraı berilipti. «Az aıtsaq ta, kóp aıtsaq ta, dittegenimiz - Mirjaqyp Dýlatovtyń 125 jyldyq mereıtoıyn urpaqqa úlgi-ónege bolarlyqtaı etip, ulttyq maqtanyshymyzdyń ǵasyrdan astam buryn aıtyp ketken ulaǵatynyń búgingi táýel­siz­digimizge de molynan qyzmet jasap jatqanyn saralap kórsetip, joǵary deńgeıde ulyqtap ótkizsek, Alash arysy aldyndaǵy paryz ben qaryzymyz sál de bolsa óteler edi-aý!»,- deıdi basylym.

«Egemen Qazaqstan» gazetiniń búgingi sanynda Qazaqstan musylmandary dinı basqarmasy men Orta Azııa múftıler keńesiniń tóraǵasy, Bas múftı Sheıh Ábsattar qajy Derbisáliniń «Sýnaq ata» atty maqalasy jaryq kóripti. Maqalada halyq «Sýan ata» dep atap ketken ortaǵasyrlyq oqymysty babamyz Husam ad-Dın as-Syǵanaqı týraly derekter baııandalady.

***

Keshe el Prezıdenti Nursultan Nazarbaev halyq qalaýlylaryn qabyldady. Atalǵan taqyrypty arqaý etken maqala «Aıqyn» basylymynyń búgingi sanynda «Prezıdent shynaıy aqparattar úshin alǵys aıtty» degen atpen jaryq kóripti. «Qortyndy sózinde Memleket basshysy ındýstrııalandyrý taqyrybyna taǵy da tereńirek toqtala ketti. Osy aptanyń jumasynda Prezıdenttiń otandyq bıznesmenderdi jııatyndyǵy málim boldy. Sonda isker jandar osy másele týrasyndaǵy barlyq saýaldaryna jaýap alýǵa tıis. Elbasy qarap otyrmaý qajettigin keshe de qadap aıtty»,- deıdi basylym.

Osy taqyryptaǵy maqalany «Egemen Qazaqstan» gazetiniń búgingi sanynan da oqı alasyzdar.

«Aıqyn» gazetiniń dástúrli «Aq sóıle» aıdarynda «Bárinen bir elge táýeldi bolmaý mańyzdy» degen taqyryppen ekonomıkalyq taldaý ortalyǵynyń dırektory, ekonomıst Oraz Jandosovpen bolǵan suhbat jarııalanypty. Suhbatta ekonomıst byltyrǵy jyldyń basty ekonomıkalyq nátıjelerine qortyndy jasap, bıylǵy jylǵa joramal jasaıdy.

«Aqyl-esi kem jáne múmkindigi shekteýli, bir sózben aıtqanda, múgedek balalar sany jaǵynan Qostanaı oblysy elimizdegi «úzdik úshtikke» kiredi. Óńirdegi 210 myń balanyń 6,2 paıyzy nemese 13 165-i týmysynan taǵdyr tálkegine ushyraǵandar. Memlekettiń qaraýyna alynǵan kemtar balalardyń báriniń birdeı kóńili toq, kóılegi kók emes»,- dep jazdy «Aıqyn» gazetiniń búgingi sany. Ómirdiń tálkegine ushyraǵan jandardyń taǵdyrymen bóliskińiz kelse, basylymdaǵy «Qostanaıda 147 bala qys boıy qamalyp otyr» dagen atpen berilgen maqalaǵa nazar aýdaryńyz.

***

«Alash aınasy» gazetiniń búgingi sanynda «Tólebaev «taǵynan» túsip, Óserbaev «tórge» ozdy» atty maqala jaryq kóripti. Maqalada avtor Qyzylorda qalasy men osy oblysqa qarasty aýdandardyń áli kúnge oryssha ataýlardan aryla almaı júrgenin tilge tıek etedi. «Oblystyq tilderdi damytý jónindegi basqarmanyń málimetine súıensek, oblys kóleminde 236 kóshe kúni búginge deıin oryssha ataýynyń shekpenin sheshe qoımaǵan. Olardyń basym bóligi Aral aýdanynyń enshisinde eken. Teńiz túbindegi óńirde barlyǵy 85 kóshe oryssha atalady. Oblys ortalyǵynyń ózinde odan birshama az. Qalada 56 kóshe «uly orys halqyna» qurmetimizdi kórsetedi. Al ózge aýdandarǵa keletin bolsaq, Qazalyda - 20, Qarmaqshyda - 17, Jalaǵashta - 32, Syrdarııada - 6, Shıelide - 13, Jańaqorǵanda 7 kóshe de osyndaı jaǵdaıdy basynan keshirip otyr» deı kele, tipti olardyń arasynda kópshilikke túsiniksiz Stepnaıa, Morskaıa, Jarty kazarma degen kósheler de bar. Osyndaı jartykesh ataýlardy aýystyrýǵa kúni búginge deıin kúshimiz jetpeı júr me?» dep, oqyrmanǵa oı tastaıdy.

«Jaıyqtyń boıy kók shalǵyn, kúzermiz de jaılarmyz», dál osylaı Mahambet batyr jyrlaǵan Jaıyq ózeniniń qazirgi ahýaly kúnnen-kúnge azyp barady. Jaıyqty mekendegen turǵyndar men atqarýshy bıliktiń ózendi qorǵaý týraly janaıqaıy joǵary jaqqa jetkenmen de, Jaıyq ózeniniń arnaıy mártebesi bolmaýy onyń taǵdyryna aıtarlyqtaı áserin tıgizip otyr»,- dep jazǵan «Alash aınasy» gazetindegi kelesi maqala erke Jaıyqtyń búgingi jaǵdaıyna alańdaýshylyq bildiredi. Tolyǵyraq «Jaıyqta qaıyq qaırańdaıtyn kún jaqyn» degen taqyryptaǵy maqaladan oqyńyzdar.