Qostanaıda 143 adam qyzylsha juqtyrǵan
QOSTANAI.QazAqparat - Qostanaı oblysynda qyzylsha aýrýyn juqtyrǵandar qatary artty, dep habarlaıdy QazAqparat Qostanaı oblysy qoǵamdyq densaýlyq saqtaý departamentiniń basshysy Oral Bekmaǵambetovke silteme jasap.
Basqarma basshysynyń aıtýynsha, búginde qyzylshamen syrqattaný jaǵdaıy kúrdelene tústi.
«Osy jyldyń qańtar aıynan óńirimizde 143 jaǵdaı tirkeldi. Syrqattanǵandardyń 33%-y - 1 jasqa deıingi balalar, 30%-y - 1 jastan 14 jasqa deıingi balalar, qalǵandary - eresek balalar. Zardap shekkenderdiń eń kóp úlesi Qostanaı qalasyna tıesili. Munda 101 adam aýrý juqtyrǵan. 6 adam - Rýdnyı qalasy men Jangeldın aýdanynda, 11 adam Qostanaı aýdanynda tirkeldi», - dep málim etti O. Bekmaǵambetov.
Oblysta qyzylshaǵa qarsy qosymsha ımmýndaý bastaldy. Osy úshin óńirge 12 myń vaktsına kelip tústi.
«9-10 aılyq balalardy, syrqattanǵandarmen baılanysta bolǵan adamdardy, medıtsına qyzmetkerlerin vaktsınatsııalaý bastaldy. Osyǵan baılanysty ata-analarǵa balalardy vaktsınatsııalaýdyń mańyzdylyǵy men qaýipsizdigi týraly aqparatty túsindirý boıynsha birlesken jumys qajet»,- dedi basqarma basshysy.
Qazirgi ýaqytta Astanada, Aqmola oblysynda jáne birqatar óńirde qyzylsha aýrýshańdyǵy deńgeıiniń artqany baıqalyp otyr. Sondyqtan, dárigerler ata-analarǵa ázirge bul óńirlerge bala ertip barýdyń qajeti joq ekenin eskertedi. Qyzylsha - óte keń taralǵan ınfektsııalyq aýrý. Kóbinese balalarda kezdesedi. Onyń belgileri - dene qyzýynyń kóterilýi, murynnyń, kózdiń jáne tamaqtyń shyryshty qabyǵy qabynyp, teride bórtpelerdiń paıda bolýy. Aýrýdyń ınkýbatsııalyq kezeńi 7-den 21 kúnge deıin sozylady. Asqynyp ketse, qaıǵyly jaǵdaıǵa, ne balany múgedektikke ákep soqtyrýy múmkin. Ári bul dertpen balalar ǵana emes, eresekter de syrqattanýy múmkin deıdi dárigerler. Elimizde ótken jyldyń qarasha aıynan bastap 968 rastalǵan qyzylshanyń jaǵdaıy tirkelgen, onyń ishinde 80%-dan astamy 14 jasqa deıingi balalar arasynda. Al, syrqattardyń 67%-y - qyzylshaǵa qarsy ekpe qabyldamaǵandar.
