Qostanaıda 140-qa jýyq jer ýchaskesi memleket qajetine alynýy múmkin

Aldyn ala esep boıynsha josparlanǵan nysandardyń aýmaǵyna shamamen 139 jer ýchaskesi kiredi. Alaıda ázirge bular — bolashaqta júzege asyrylýy múmkin jobalar. Olardyń birqatary 2050 jylǵa deıingi kezeńdi qamtıdy.

Jer ýchaskeleriniń naqty sany jobalyq qujattama ázirlengen saıyn naqtylanady. Jerdi memleket qajetine alý rásimderi Qazaqstannyń Jer kodeksi men «Memlekettik múlik týraly» zańyna sáıkes júrgizilýge tıis.

Úsh jańa estakada salynady

Bas josparǵa engizilgen túzetýlerde úsh estakada salý qarastyrylǵan. Alǵashqysy Doşanov kóshesinen Dostyq kóshesine shyǵatyn baǵytta boı kótermek. Jobalyq qujattamany ázirleý 2027 jyly bastalady dep josparlanǵan. Bolashaq nysannyń aýmaǵyna jalpy kólemi 1,9 gektar bolatyn shamamen 16 jer ýchaskesi kiredi.

Qalǵan eki estakada bas jospardy júzege asyrýdyń keıingi kezeńderinde salynbaq. K.Dónenbaeva kóshesinen Shaqshaq Jánibek batyr kóshesine shyǵatyn estakada qurylysy 2040–2050 jyldarǵa josparlanǵan. Joba shamamen 1 gektar aýmaqtaǵy 22 jer ýchaskesin qamtıdy.

Al Táýelsizdik kóshesinen K.Dónenbaeva kóshesine shyǵatyn estakadany 2030–2040 jyldary salý kózdelgen. Qurylys aýmaǵyna jalpy kólemi shamamen 3 gektar bolatyn 44 jer ýchaskesi kiredi. Olardyń basym bóliginde jeke turǵyn úıler ornalasqan.

Budan bólek, estakada qurylysyna deıin «Bereke» shaǵyn aýdanyndaǵy aınalma joldan K.Dónenbaeva kóshesine shyǵatyn jol salý usynylyp otyr. Bul jobaǵa taǵy úsh jer ýchaskesin memleket menshigine alý qajet bolýy múmkin. Onyń bireýi — 0,68 gektar jer ýchaskesi jol aýmaǵyna túgelge jýyq kirse, qalǵan ekeýiniń bir bóligi ǵana qamtylady.

Jańa qosalqy stantsııaǵa jer bólinedi

Qaladaǵy energetıkalyq ınfraqurylymdy damytý da bas josparǵa engizilgen ózgeristerdiń biri. Qostanaıdyń ortalyq-shyǵys bóliginde jańa turǵyn úıler men áleýmettik nysandardy elektr qýatymen qamtamasyz etý úshin «Shyǵys» 110/10 kV qosalqy stantsııasyn salý jobalanyp otyr. Ol elektr qýatynyń qosymsha rezervin qalyptastyrýǵa múmkindik beredi.

Qazir nysan aýmaǵyna arnalǵan egjeı-tegjeıli josparlaý jobasy memlekettik saraptamadan ótip jatyr. Jyl sońyna deıin oń qorytyndy alý josparlanǵan. Osydan keıin jer ýchaskeleriniń ıelerimen jumys bastalady. Aldyn ala esep boıynsha qosalqy stantsııa aýmaǵyna shamamen 35 jer ýchaskesi kiredi.

Sonymen qatar Nursultan Nazarbaev dańǵyly men Fabrıchnaıa jáne Rabochaıa kósheleriniń arasyndaǵy aýmaqqa arnalǵan egjeı-tegjeıli josparlaý jobasy ázirlenip jatyr. Munda qalanyń ortalyq bóligin elektr qýatymen qamtamasyz etetin jabyq úlgidegi «Ortalyq» qosalqy stantsııasyn ornalastyrý kózdelgen.

Qaı jerde jańa saıabaqtar paıda bolýy múmkin?

Bas jospardaǵy taǵy bir ózgeris jańa demalys aımaqtaryn qurýǵa qatysty.

K.Dónenbaeva kóshesiniń boıynda «Bereke», «Altyn Arman», «Soltústik-Batys» jáne «ıÝbıleınyı» shaǵyn aýdandary ornalasqan. Bul aýmaqtyń jalpy kólemi shamamen 375 gektar bolǵanymen, munda úlken saıabaqtar joq.

Bas jospardy ázirleýshiler «Tobyl Arenaǵa» deıingi óndiristik jáne qoıma nysandary ornalasqan qoǵamdyq-iskerlik aýmaqtyń bir bóligin demalys aımaǵyna aınaldyrýdy usynyp otyr.

Bolashaq saıabaqtyń aýmaǵyna 8 jer ýchaskesi kiredi. Olardyń ishindegi eń úlken ýchaskeniń ıesimen kezdesý ótkizilgen. Qazir ol bas jospardy ázirleýshilerdiń usynysyn zerdelep jatyr.

Taǵy bir demalys aımaǵyn Vysokaıa kóshesiniń boıynda, K.Dónenbaeva kóshesinen N.Nazarbaev dańǵylyna deıingi aralyqta qurý usynylǵan. Onyń aýmaǵy shamamen bir gektar bolady.

Bolashaq saıabaqtyń aýmaǵyna jeke turǵyn úı qurylysyna arnalǵan jalpy kólemi shamamen 0,55 gektar bolatyn 11 jer ýchaskesi kiredi. Onda 7 turǵyn úı bar. Bul úıler ortalyq ınjenerlik jelilerge qosylmaǵan. Turǵyndar sýyq sýdy paıdalanady, káriz júıesiniń ornyna septık ornatylǵan. Alaıda gaz, ortalyqtandyrylǵan ystyq sý jáne káriz júıesi joq. Úıler peshpen jylytylady.

Sonymen birge bul jerlerdi memleket qajetine alý máselesi ázirge kún tártibindegi basty mindetterdiń biri emes. Atalǵan aýmaq bolashaqta demalys aımaǵyn qurýǵa arnalǵan jer retinde qarastyrylyp otyr.

Buǵan deıin qostanaılyq fermerler kúnbaǵysty shetelge erkin satqysy keletini týraly jazǵan bolatynbyz.