Qostanaıda 134 áıel laýazymdy qyzmetterdi atqarady
QOSTANAI. QazAqparat - Arhımed Muhambetov qostanaılyq názik jandardy Halyqaralyq áıelder merekesimen quttyqtady, dep habarlaıdy QazAqparat.
E.Ómirzaqov atyndaǵy oblystyq fılarmonııada Halyqaralyq áıelder kúnine arnalǵan saltanatty kesh uıymdastyryldy. Aldymen, arýlardy óńir basshysy Arhımed Muhambetov quttyqtady. Onyń sózinshe, oblystaǵy memlekettik qyzmetshilerdiń 60% - áıelder qaýymy.
«Qostanaı oblysy genderlik saıasatty júzege asyrý jolynda belgili bir jetistikterge jetti. Birinshi kezekte, er azamattar men áıelderdiń eńbek jaǵdaılarynyń teńdesýi. Onyń ishinde bıznes, saıasat jáne memlekettik basqarý, bilim berý jáne densaýlyq saqtaýǵa teń quqyqtylyq, sonymen qatar ana men balanyń jan-jaqty qamtamasyz etilýin qamtıdy. Oblystyń jergilikti atqarýshy organdarynda eńbek etetin 134 áıel laýazymdy qyzmetterde. Onyń ishinde 5 oblystyq basqarmanyń basshysy, 8 qala-aýdan ákimderiniń orynbasarlary, 34 aýyldyń ákimi bar. Sonaý qıyn-qystaý jyldarda eldiń eńsesin kóterýge atsalysýdan bastap, búgingideı álemge tanylyp, básekege barynsha qabiletti memleket bolýǵa umtylyp otyrǵan zamanda ár salada jetistikterge jetken talantty qyz-kelinshekterdiń qosqan úlesi sheksiz. Olardyń ishinde Márııam Hakimjanovanyń, Sotsıalıstik Eńbek Erleri Kámshat Dónenbaeva men Alevtına Kýzmınanyń atqarǵan isteri osyǵan dálel»,- dedi aımaq basshysy.
Óńir ákimi aıtqandaı, Qostanaı oblysynda tórt jáne odan kóp bala ósirip, tárbıelep otyrǵan 5 086 otbasy esepte tur. Olardyń bári naqty baqylaýǵa alyndy.
«Kópbalaly jáne az qamtylǵan otbasylardy qoldaý jóninde birneshe baǵyt boıynsha jospar qurdyq. Atap aıtqanda, iri kompanııalar men kásipkerler esebinen páterler bólý, jeke turǵyn úı qurylysy úshin jer ýchaskelerin berý, turǵyn úıge bastapqy jarnany sýbsıdııalaý, kópbalaly jáne az qamtylǵan otbasylar úshin jalǵa beriletin turǵyn úı sanyn kóbeıtýdi basty nazarǵa aldyq. Keıbir kompanııalar bul kómekke ózderi nıet bildirip otyr. Búginde qostanaılyq kásipkerler men aýyl sharýashylyǵy taýarlaryn óndirýshilerdiń belsendi azamattyq ustanymynyń arqasynda 10 kópbalaly jáne az qamtylǵan otbasyǵa turǵyn úımen qamtamasyz etýge kómek kórsetildi. Bul jumystar bıyl da jalǵasady»,- dedi Arhımed Muhambetov.
Qostanaı oblysynda 6500 ana «Altyn alqa» jáne «Kúmis alqa» tósbelgileriniń ıegerleri. Búgingi keshte olardyń 20 shaqtysy Arhımed Muhambetovtiń qolynan laıyqty marapattaryna ıe boldy.
Munan soń atqarýshy bılik ókilderinen bastap, kásipkerler, sportshylar jáne qoǵamdyq uıym ókilderi názik jandardy merekelerimen quttyqtady. Shara sońynda kontserttik baǵdarlama uıymdastyryldy.
