Qostanaıda 130 jyldyq tarıhy bar meshitti jóndeý jumystary qashan aıaqtalady
«Búginge deıin bul meshit Qazaqstan Musylmandary dinı basqarmasynyń balansynda boldy. QMDB-nyń balansynan bizge ótkizý protsedýralary bir jarym jyldaı ýaqyt aldy. Arnaıy «Aqmeshit» qory quryldy. Ony oblysymyzǵa eńbegi sińgen qaıratker Sabyrjan Ahmetuly basqarady. Demeýshiler qarjy bóldi. Qazirgi tańda jobalyq-smetalyq qujattama ázirlenip jatyr. Biz bul baǵytta Tatarstanǵa eńbegi sińgen sáýletshini arnaıy shaqyrdyq. 2019 jyldyń 1 naýryzyna deıin jobalyq-smetalyq qujattama daıyndalyp, saraptamadan ótedi. Odan keıin qurylys-montajdaý jumystary bastalady. Ony 6-8 aıda aıaqtaýdy josparlap otyrmyz. 2019 jyldyń osy mezgilinde - qazan-qarasha aılarynda tolyǵymen bitirýdi kózdep otyrmyz», - dedi Qostanaı oblysynyń ákimi Arhımed Muhambetov búgin Astanada ótken brıfıng barysynda.
Arhımed Muhambetov óz sózinde meshitke 30 jyldan beri kúrdeli jóndeý júrgizilmegenin tilge tıek etti.
«Sý qurylǵylary, barlyǵy paıdaǵa aspaı tozyp tur. Sondyqtan, kúrdeli jóndeý jumystaryn ózim jiti baqylaýǵa alyp otyrmyn», - dedi ol.
Aıta ketsek, Maral Ishan meshiti tarıhyn HІH ǵasyrdan bastaıtyn kóne meshitterdiń biri. Burynǵy - Aqmeshit. 1879 jyly Tobyl ózeni jaǵasynan boı kótergen Qostanaıda bas-aıaǵy bes-alty jyl ishinde óndiris oryndary ashylyp, jan-jaqtan el jınaldy. Birte-birte óse kele, aımaq ortalyǵyna aınaldy. Qalaǵa musylmandar kóptep ornyǵýyna oraı ımandylyqty nasıhattaıtyn meshit máselesi qolǵa alyna bastady. Din úıi jergilikti halyqtyń qarjysyna, asar ádisimen salyndy.
Eske sala ketsek, atalmysh brıfıngte Arhımed Muhambetov Qostanaı oblysynda jyl basynan beri avtokólik qurastyrý 15,7 paıyzǵa artqanyn aıtty. Onyń sózine qulaq assaq, osyndaı ósimmen Qostanaı oblysy 2023 jylǵa qaraı jylyna 60 myń avtokólik shyǵarýdy kózdep otyr.
Sondaı-aq, aımaq basshysy óńirdegi agroónerkásiptik keshen salasyna tsıfrlyq tehnologııalar qalaı engizilip jatqanyn, «7-20-25» turǵyn úı baǵdarlamasy boıynsha qansha qostanaılyq baspanaly bolǵanyn aıtyp berdi.
