Qostanaıda 13 hokkeı alańy salynady
QOSTANAI. QazAqparat - Qostanaı qalasynda «Smart city» jobasynyń 5 baǵyty júzege asyrylady. Bul týraly qalalyq ákimdikte ótken jıynda málim boldy, dep habarlaıdy QazAqparat tilshisi.
Bıyl «Qostanaı aýlalary» baǵdarlamasy aıasynda, qalanyń 28 aýlasy abattandyrylady, sonymen qatar 15 kópsalaly hokkeı alańy, 13 fýtbol alańy jáne jattyǵý alańqaılary ornatylady. Jalpy, 2018 jyly jol kesheni boıynsha 39 kóshe, sonyń ishinde kvartal ishilik aýmaqtar jóndelýden ótedi.
«Qostanaı qalasynda «Smart city» jobasynyń 5 baǵyty júzege asyrylady. Solardyń biri - «Aqyldy qala». Bul keshendi júıe jolaýshylardy qoǵamdyq kólik qozǵalysynyń kestesi, avtobýstardyń júretin joly týraly jedel aqparatpen qamtamasyz etedi. Sonymen qatar, tótenshe jaǵdaılar oryn alǵan bolsa, lezde habar beredi. Qala turǵyndary atalǵan jobanyń qosymshasyn óz telefondaryna júkteı alady», - dedi qalalyq TKSh, jolaýshylar kóligi jáne avtomobıl joldary bóliminiń basshysy Alekseı Tarasov.
Onyń aıtýynsha, búginde qalaǵa 10 myńǵa jýyq jaryqshamdar qajet. Ol 309 shaqyrymǵa sozylatyn jol jıegine ornatylady. Qazirdiń ózinde Qostanaı-2 shaǵynaýdanynda kósheni jaryqtandyrý jumystary júrgizilip jatyr.
Jalpy, bıyl 10 kóshe qalypqa keltiriledi. Oǵan 4,2 mlrd teńge jumsalady. Olardyń ishinde byltyr aıaqsyz qalǵan 3 nysan osy jyly aıaqtalady. Olar: Gogol-Amangeldi kóshelerimen shektesetin Naberejnaıa kóshesi; Qaıyrbekov-Borodın kóshelerimen shektesetin Lermontov kóshesi; Ýralskıı-Voın-ınternatsıonalıster kóshelerimen shektesetin Táýelsizdik kóshesi. 2017 jyly qala kóshelerinde 51 aıaldama beketi ornatyldy. Aǵymdaǵy jyly bul jumystar jalǵasyp, taǵy da 40 aıaldama beketi turǵyzylmaq.
