Qostanaıda 120 turǵynǵa páter kilti tabystaldy
QOSTANAI. QazAqparat - Qostanaıda memlekettik baǵdarlama arqyly salynǵan 120 páterlik eki turǵyn úı tapsyryldy, dep habarlaıdy QazAqparat tilshisi.
Birinshi nysan qaladaǵy 9-shaǵyn aýdanda ornalassa, ekinshisi - «Áýejaı» aýdanynda. Bul úıler "Nurly jer" baǵdarlamasy boıynsha salynǵan. Páterge ıe bolǵandar - «Turǵyn úı qurylys jınaq banki» salymshylary. Baspanalardyń jartysy jergilikti atqarýshy organ qyzmetkerlerine tapsyryldy. Qalǵan 50%-y - ákimdikte turǵyn úı kezeginde turǵandarǵa tıesili.
Qýanysh ıelerin quttyqtaýǵa Qostanaı oblysynyń ákimi Arhımed Muhambetov keldi.
«Elbasynyń tapsyrmasymen elimizde «Nurly jer» baǵdarlamasy júzege asyp jatyr. Bıyl biz birqatar áleýmettik nysyndardy iske qostyq. Memlekettik baǵdarlama arqyly salynǵan úılerdi turǵyndardyń ıgiligine berip otyrmyz. Kóp keshikpeı «Áýejaı» shaǵyn aýdanynda taǵy da jańa páterler óz ıelerine tabystalady», - dedi oblys ákimi.
«Turǵyn úı qurylys jınaq banki» oblystyq fılıalynyń dırektory Dáýren Saýdabaevtyń aıtýynsha, mundaǵy bir bólmeli páter 5,5 mılııon teńgege shyǵady.
«Bank salymshylarǵa 5%-ben zaem berdi. Syıaqy mólsherlemesi Qazaqstan ıpotekalyq kompanııasy tólegen memlekettik sýbsıdııanyń arqasynda tómendetildi. Nesıe rásimdeý úshin TÚQJB depozıtinde úı qunynyń kem degende 30%-y bolýy qajet boldy», - dedi Dáýren Saýdabaev.
Páter kiltine ıe bolǵandardyń qatarynda jalǵyzbasty ana Aınur Taýsoǵarova da bar.
«Bankpen byltyrdan bastap jumys isteı bastadym. Munyń syrtynda ákimdiktiń kezeginde turǵan edim. Árıne, qýanyshymda shek joq. Bastysy, óz úıim bar. Endi aldaǵy 10 jyl boıy aı saıyn 37 myń teńgeden tólep turamyn. Bul qazirgi jaldap turyp jatqan páterimnen áldeqaıda az», - dedi ol.
