Qostanaıda 12 myń avtokólik shyǵaryldy
QOSTANAI. QazAqparat - Qostanaı oblysynyń jalpy ishki ónimi 10,3%-ǵa ósti. Bul týraly búgin apparat májilisinde oblys ákiminiń orynbasary Erlan Spanov málim etti, dep habarlaıdy QazAqparat.
Oblys ákimdiginde Arhımed Muhambetovtiń tóraǵalyǵymen keńeıtilgen otyrys ótti. Jıynda óńirdiń byltyrǵy damý kórsetkishteri qorytyndylanyp, 2019 jyldyń alǵashqy jartysyna josparlanǵan jańa mindetter pysyqtaldy. Oblys ákiminiń orynbasary Erlan Spanovtyń sózinshe, óńirdiń áleýmettik-ekonomıkalyq damýynda ósim bar.
«2018 jyly oblystyń jalpy ishki ónimi 10,3%-ǵa ósti. Buǵan qosa ónerkásip ónimderiniń kólemi de edáýir ulǵaıǵan. Ásirese taý-ken óndirisi men óńdeýshi kásiporyndarda ósim joǵary. Óńdeý salasyndaǵy ósim - 105,8%. Aýylsharýashylyq taýarlaryn óńdeý salasy óńirdegi ishki naryqtyń tutasqa jýyǵyn qamtyp otyr. Azyq-túlik ónimderiniń eksporty edáýir artty. Atap aıtqanda, syrtqy saýdadaǵy et ónimderiniń úlesi 4 ese, sút ónimderi 12%, un 58%, kondıter ónimderi 19%-ke ósken. Birneshe jyl boıy turalap qalǵan ósimdik maıynyń eksporttyq úlesi 6,2 esege kóbeıdi», - dedi ákim orynbasary.
Erlan Spanov mashına jasaý salasy da jyl sanap qarqyn alyp keletinin aıtty. Byltyr «SaryarqaAvtoProm» seriktestiginde 11 766 jeńil avtokólik, 159 júk kóligi qurastyryldy. Bul Qostanaı óńirinde buryn sońdy bolmaǵan kórsetkish.
2018 jyly oblys kásiporyndary jalpy quny 183,1 AQSh dollaryna teń jergilikti ónimdi eksportqa jóneltken.
Oblysta shaǵyn jáne orta bıznesti damytýǵa tıimdi jaǵdaı jasalǵan. Máselen, 2018 jyly jeke kásipkerler sany 3,5%-ǵa artqan. Búginde oblysta ár sala boıynsha 51 myń jeke kásipker eńbek etedi. Shaǵyn jáne orta bıznes nysandarynyń kóbeıýi saýda salasynyń jandanýyna oń yqpal etip otyr. Óıtkeni 40%-ten astam kásipker ishki saýda salasynda qyzmet kórsetedi.
Ekonomıka ósimi áleýmettik salanyń turaqtylyǵyna tikeleı yqpal etip otyr. 2018 jyly óńirde 13 myń jańa jumys orny ashylǵan. 2,6 myń jumyssyz kásibı oqýǵa jiberildi. Kásibı bilim beretin mekemelerde oqý támamdaǵan 1,3 myń adam eńbekpen qamtyldy. Munyń syrtynda, «Bastaý Bıznes» jobasy boıynsha 2 myńnan astam adam kásiptik oqýǵa tartylǵan. Oqýdy aıaqtaǵan 1543 adamnyń 361-i jeńildetilgen nesıe alǵan.
Jyl basynan beri qurylys salasynda da qyrýar sharýa aqaryldy. Byltyr «Nurly jer» baǵdarlamasy boıynsha 299,3 myń sharshy metr turǵyn úı salyndy. Nátıjesinde oblys boıynsha 3172 páter paıdalanýǵa berildi.
