Qostanaıda 11 adam ystan ýlandy
QOSTANAI. QazAqparat - Qostanaı oblysynda jyl basynan beri 11 adam gazǵa ýlanyp qalǵan. Bul týraly oblystyq Tótenshe jaǵdaılar departamentinde ótken jıynda málim etildi, dep habarlaıdy QazAqparat tilshisi.
TJD mamandary jyl basynan beri gazǵa ýlanýdyń saldarynan 11 adam zardap shegip, 3-eýi kóz jumǵanyn aıtady. Onyń bireýi - bala. Byltyrǵy jyly osyǵan uqsas 10 oqıǵa tirkeldi. 22 adam zardap shegip, 15 adam ajal qushqan.
Máselen, Jitiqara aýdany Aınabulaq aýylyndaǵy turǵyn úıde 8 adam tabıǵı gazǵa ýlanyp, aýrýhanaǵa jatqyzyldy. Sondaı-aq, Taran aýdany, Tobyl aýylynda 1 bala gazǵa tunshyǵyp, qaıtys boldy.
Departament bastyǵynyń orynbasary, podpolkovnık Azamat Orynbaevtyń sózinshe, aldyn alý is-sharalarynyń júrgizilýine qaramastan, turǵyn úı sektoryndaǵy adam óliminiń deńgeıi sol kórsetkishte qalyp otyr.
«2017 jyldyń jylytý maýsymy bastalǵaly 37 jeke turǵyn úıde órt boldy. Jalpy, oblys esebinde 119594 jeke turǵyn úı tirkelgen. Olardyń basym kópshiligi pesh jaǵady. Ýly gazdyń ıisi de, túsi de bolmaıdy, densaýlyqqa tıgizetin áseri zor. Sol sebepti, qaýipsizdik sharalaryn barynsha saqtaýǵa shaqyramyz. Ásirese, túngi mezgilde abaı bolý kerek», - deıdi Orynbaev.
