Qostanaıda 100-den astam úı janýary teri aýrýyna ushyrady
QOSTANAI. QazAqparat - Qostanaı oblysynda 115 úı janýary teriniń parazıtarlyq túrindegi zaqymdanýyna ushyrady, dep habarlaıdy «QazAqparat» HAA tilshisi oblystyq veterınarııa basqarmasynyń basshysy Berikjan Qaıypbaıǵa silteme jasap.
Oblys ákimdiginde ótken kezekti apparat keńesinde veterınarııa salasynyń máseleleri qaraldy. Jalpy, óńirde 2016 jyldan beri brýtsellezge shaldyqqan qara maldyń sany azaıǵan.
«Óńirde aýyl sharýashylyǵyndaǵy jetistikterdiń deni qaı ýaqytta da epızootııalyq ahýaldyń turaqtylyǵyna baılanysty. 2015 jyly óńirdegi úı janýarlarlarynyń 0,87% brýtsellez juqtyrsa, ótken jyly onyń deńgeıi 0,59% deıin tómendegen. Áýlıekól aýdanynda sońǵy eki jyl ishinde ahýaly nashar 12 meken saýyqtyrylsa, ótken jyly atalmysh aımaqtarda qaýipti indetti juqtyrý deńgeıi 2,5 esege kemidi. Bul kezeńde barlyǵy 4 418 qara mal soıyldy. Jalpy, qazir epızootııalyq jaǵdaı turaqty jáne oblystyń veterınarııalyq qyzmettiń baqylaýynda», - dedi Berikjan Qaıypbaı.
Degenmen, keı óńirlerde jaǵdaı áli qalypqa kele qoıǵan joq. Qostanaımen shekaralas Orynbor oblysynda 2017 jyly iri qara maldyń nodýlıarlyq dermatıtiniń birneshe qolaısyz aýmaqtary tirkelgenin eskerip, qostanaılyq veterınarııa mamandary bıyl oblystaǵy barlyq iri qara malǵa indetke qarsy vaktsına egýdi josparlap otyr. Aıta ketý kerek, 2017 jyldyń tamyz aıynda bizdiń oblystyń 3 aýdanynda (Jitiqara, Qamysty, Qostanaı) 115 bas mal teriniń parazıtarlyq túrindegi zaqymdanýyna ushyrady. Óńirdegi veterınarııalyq qyzmetkerler indettiń aldyn alý maqsatynda emdeý men dezınfektsııanyń keshendi is-sharalaryn jedel túrde júzege asyrdy. Nátıjesinde, barlyq janýarlar aıyqty. Qoldanylǵan emdik sharalarǵa baılanysty veterınarııalyq zerthanaǵa patologııalyq materıaldar jiberilgen joq.
«Arqalyq qalasynyń aýmaǵynda 2017 jyly juqpaly mal aýrýynyń deńgeıi 1,8 % ósken. Sondyqtan, indetti ýshyqtyryp almas úshin salalyq basqarma qalalyq ákimdikke Fýrmanov, Jalǵyztal, Ekidiń, Kóktaý, Jańaqala aýyldarynda brýtsellezdi qosymsha zertteýdi mindettedi. Biraq, odan esh nátıje shyqqan joq. Aty atalǵan eldi mekenderde aýrýǵa shaldyqqan 5030 qara mal esepke alynsa, sonyń bar bolǵany 1562-si ǵana tekserilgen», - dedi basqarma basshysy.
Veterınarııa basqarmasy josparly tekserýlerden keıin, ótken jeltoqsan aıynda soıylǵan maldardan týberkýllez aýrýyn anyqtapty. Bul asha tuıaqtylar «Arqalyq tájirbıe stansasy» JShS-ine tıesili. Osydan keıin sharýashylyqtaǵy barlyq 417 iri qara tekserilgen. Sonyń 26-sy qaýipti indetti juqtyrǵany belgili boldy. Muny Astanadaǵy veterınarlyq referent ortalyǵy da rastady. Berikjan Qaıypbaıdyń sózinshe, jergilikti jerdegi mamandar indettiń taralýyn jasyrady. Bul aýrýdy órshitpese, kemitpesi anyq. Máselen, Arqalyqtaǵy sharýashylyqta aýrý oshaǵy jıyrma kún buryn anyqtalǵanmen, ıesi mamandarǵa habar bermegen. Sáıkesinshe, aldyn alý sharalary der kezinde júrgizilmegendikten, ony saýyqtyrý da biraz ýaqytty aldy. Oblys ákimi Arhımed Muhambetov basqarma basshysyna mal aýrýy órship turǵan óńirlerdi qatań baqylaýda ustaý qajettigin qatań tapsyrdy.
«Atqarylǵan jumystarǵa esh shúbá keltirmeımin. Biraq, ol jetkilisiz. Juqpaly derttiń aldyn alý sharalaryn pármendi túrde júrgizý qajet. Eger jergilikti jerlerde tıisti jumystar óz deńgeıinde atqarylmaıtyn bolsa, onda tıisti mamandar jaýap berýi tıis. Mundaı kemshilikterdi jibermeý qajet»,-dedi óńir basshysy.
