Qostanaıda 100-den astam lıftiniń paıdalaný merzimi ótip ketken
ASTANA. KAZINFORM — Qostanaıda júzden astam jolaýshylar lıfti belgilengen eń uzaq paıdalaný merziminen asyp ketken. Eskirgen jabdyqtardy aýystyrýǵa mıllıardtaǵan teńge qajet.
Qala ákimdiginiń lıft ınfraqurylymynyń jaı-kúıi týraly málimetine sáıkes, búginde Qostanaıda 516 jolaýshylar lıfti bar. Onyń 146-sy belgilengen 25 jyldyq paıdalaný merzimin ótegen.
Qoldanystaǵy zańnamaǵa sáıkes, belgilengen talaptar saqtalǵan jaǵdaıda lıftilerdi taǵy toǵyz jyl paıdalanýǵa bolady. Alaıda Qostanaıdaǵy 105 lıfttiń qoldanys merzimi 34 jyldan asyp ketken. Sondyqtan olardy aýystyrý qajet.
Apatty jaǵdaılardyń aldyn alý úshin mamandandyrylǵan uıymdar kóppáterli turǵyn úılerdi basqarý organdarymen birlesip, jabdyqtardyń tehnıkalyq jaı-kúıin baqylap otyrady. Negizgi toraptar men mehanızmderdiń jaramdylyǵyna kún saıyn monıtorıng júrgizilip, qajet bolǵan jaǵdaıda jóndeý jumystary atqarylady.
Qalada lıftilerdi kezeń-kezeńimen, qaıtarymdy negizde aýystyrý baǵdarlamasy jumys isteıdi. Oǵan qatysý úshin páter ıeleriniń tıisti sheshimi qajet.
2024-2025 jyldary Qostanaıda jalpy quny 322,9 mln teńge bolatyn 20 lıft aýystyryldy. Al 2026 jyly 8-shaǵyn aýdandaǵy № 9 úıdiń taǵy tórt lıftisin aýystyrý jumystary júrip jatyr. Bul maqsatqa 60 mln teńge bólingen. Montaj jumystaryn jeltoqsanda aıaqtaý josparlanǵan.
Esep boıynsha, bir jolaýshylar lıftisin tolyq aýystyrýdyń ortasha quny shamamen 15 mln teńge. Paıdalaný merzimi ótken 146 lıftini túgel jańartý úshin shamamen 2,19 mlrd teńge qajet. Baǵdarlama páter ıeleriniń kelisimin alý jáne bıýdjettik ótinimderdi qalyptastyrýǵa qaraı jalǵasady.
Eske salaıyq, buǵan deıin Atyraýda kópqabatty 45 úıdi jóndeýge jáne 67 lıftini aýystyrýǵa 3,7 mlrd teńge qajet ekenin jazǵanbyz.
