Qostanaıda 10 shaqty páter tonaǵan ákki ury ustaldy
QOSTANAI. QazAqparat - Qostanaı qalalyq ishki ister basqarmasynyń qyzmetkerleri birneshe páterdi tonady degen kúdikpen 40 jastaǵy er adamdy qolǵa túsirdi. Bul týraly Qostanaı oblysy ІІD baspasóz qyzmeti habarlady.
Kúdikti kezekti urlyǵynan soń qolǵa tústi. Tergeý sharalary dáleldegendeı, ol buǵan deıin 10 shaqty páterdi tonaǵan. Ol alǵashqy jymysqy áreketin byltyr maýsym aıynda júzege asyrǵan.
«Kúdiktiniń osy ýaqytqa deıin keltirgen shyǵyn kólemi - 600 myń teńge. Ol sońǵy ret Jýkovskıı kóshesindegi jeke úıge enip, 100 myń teńgeni qoldy qylǵan. Ákki ury úılerge plastık terezeni búldirý arqyly kirip otyrǵan. Páterlerden asyl buıymdar, turmystyq tehnıkalardy da alyp ketken. Qazir «Urlyq» babymen sotqa deıingi tergeý jumystary júrip jatyr. Kúdikti ýaqytsha ustaý ızolıatoryna qamaldy», - dedi oblystyq ІІD-niń baspasóz hatshysy Irına Bejenar.
