Qostanaıda 10 myńǵa jýyq bótelke zańsyz alkogol tárkilendi

QOSTANAI. KAZINFORM — Qostanaı qalasynda zańsyz aınalymda bolǵan 9 606 bótelke alkogol ónimi tárkilendi. Jalpy kólemi — 5 054 lıtr. Bul ónimder Qazaqstan Respýblıkasynyń salyq zańnamasyn buza otyryp satylǵan.

Qostanaı oblysy boıynsha memlekettik kirister departamentiniń jáne Qostanaı qalasy boıynsha memlekettik kirister basqarmasynyń qyzmetkerleri aktsızdik markamen tańbalanbaǵan iri kólemdegi alkogol óniminiń partııasyn anyqtady.

Tekserý barysynda er adamnyń esepke alý-baqylaý markalarynsyz alkogol ónimderin saqtap, zańsyz satqandyǵy belgili boldy. Barlyq ónim kólemi – 5 054 lıtr nemese 9 606 bótelke.

Vedomstvo ókilderi esepke alý-baqylaý markalary taýardyń zańdy jolmen óndirilgenin jáne aktsızder men salyqtardyń tólengenin rastaıtyn mindetti tańbalaý elementi ekenin eske saldy.

Atalǵan derek boıynsha ákimshilik is qozǵalyp, barlyq alkogol ónimi tárkileýge alyndy.

Memlekettik kirister organdary azamattar men kásipkerlerge tek resmı jáne tekserilgen jetkizýshilerden ǵana alkogol ónimin satyp alýǵa keńes beredi.

Eske sala keteıik, buǵan deıin Qostanaıda alkogolmen baılanysty qylmystar sany artqany habarlandy.