Qostanaı joldarynyń 85% jaqsy jáne qanaǵattanarlyq jaǵdaıda

ASTANA. QazAqparat – Qostanaı oblysynyń ákimi Qumar Aqsaqalov óńirdegi avtojol jaǵdaıyn baıandady. Bıyl avtojol salasynyń bıýdjeti 55,7 mlrd teńgeni qurady, dep habarlaıdy QazAqparat tilshisi.

«Qostanaı oblysynda elimiz boıynsha eń uzyn avtojol (9 179 shaqyrym) tirkelgen. Bıyl avtojol salasynyń bıýdjeti 55,7 mlrd teńgeni qurady, bul ótken jylǵy deńgeıden 30%-ke artyq. Bıyl 446 shaqyrym avtojol (48 ýchaske) jáne eldi mekenderdegi kóshelerdiń 299 ýchaskesi jóndeledi», - dedi Q. Aqsaqalov elordada Ortalyq kommýnıkatsııalar qyzmetinde ótken baspasóz máslıhatynda.

Sonymen birge, «Aýyl – El besigi» baǵdarlamasy aıasynda 57 eldi mekenniń 118 kóshesine ortasha jóndeý jumystary júrgiziledi.

«Qazir «jaqsy» jáne «qanaǵattanarlyq» jaǵdaıdaǵy oblystyq jáne aýdandyq mańyzy bar avtomobıl joldarynyń úlesi 85% quraıdy, bıylǵy jyl qorytyndysy boıynsha úlesti 87%-ke deıin jetkizý josparlanýda», - dedi Qumar Aqsaqalov.

Aıta keteıik, Qostanaı oblysynyń ákimi Qumar Aqsaqalov elordada aıdaǵy áleýmettik-ekonomıkalyq damý jóninde esep berýde.