Qostanaı jylqy zaýyty kókpar men aýdaryspaq attaryn suryptaýǵa kirispek

ASTANA. KAZINFORM – Elordadaǵy Qazaqstan jeńil atletıkalyq sport kesheninde Ulttyq sport joǵary mektebi bir jyldyq jumysyn qorytyndylaǵan jıyn ótkizip jatyr.

Іs-sharanyń aldynda Ulttyq sport qaýymdastyǵynyń vıtse-prezıdenti Tastanbek Esentaev kókpar attaryn daıarlaý máselesi týraly pikir bildirdi.

- Attardy dopıngke qarsy tekserýdi jolǵa qoıý úshin Túrkııadaǵy ǵylymı zertteý laboratorııasymen kelisken bolatynbyz. Biraq kóshpendiler oıyndaryna deıin iske asyryp úlgermedik. Degenmen aldaǵy josparymyzdyń biri bolyp qalyp otyr.

- Qazaqstandaǵy jylqy tuqymdarynyń ishinde álemge eń tanymaly – Qostanaı jylqysy. Bolashaqta osy Qostanaı jylqysyn býdandastyrý arqyly kókpardyń, aýdaryspaqtyń, teńge ilýdiń attaryn shyǵarsaq degen josparymyz bar. Qostanaı zaýyty osyndaı joba usynyp júr. Qazir biz myqty at kerek bolsa Qyrǵyzstan men Reseıden ákelemiz. Báıge attaryn da tek shetelden alyp jatyrmyz. Olaı bolmaý kerek. Ózimizde bar jylqynyń tuqymyn durys paıdalana almaı otyrmyz, - deıdi federatsııa ókili.

Sondaı-aq ol bir jyl buryn qurylǵan Ulttyq sport joǵary mektebiniń Astanada ótken Dúnıejúzilik kóshpendiler oıyndaryna daıyndyq kezinde kóp kómegi tıgenin aıtady.

- Sol mektep arqyly keshendi ǵylymı top quryldy. Kókpar, teńge ilý, sadaq atý, aýdaryspaq sııaqty sport túrlerinen oıyndarǵa qatysatyn sportshylar men attardy ǵylymı turǵyda tekserip, nusqaýlar bergen. Sportshylardy da dál sondaı tekserýden ótkizip, ǵylymı súıemeldeý jasadyq.

Mysaly, kókparǵa iriktelgen attardyń fýnktsıonaldyq dıagnostıkasyn jasady. Ol kezde jańa at satyp alýǵa ýaqyt tyǵyz boldy da, qolda bar attardy emdep amaldadyq. Attardyń azyq mázirin ǵylymı turǵyda túzdik. Onyń bárin qaltqysyz oryndaýǵa kóbiniń qarjylyq turǵydan, ınfraqurylym jaǵynan múmkindigi bola bermeıdi. Búgin osy kedergilerdi joıý úshin ne isteý kerektigin talqylaımyz, - deıdi federatsııa prezıdentiniń orynbasary.

Eske salaıyq, jýyqta ǵana Prezıdent tapsyrmasy boıynsha «Qazaq jylqy sharýashylyǵy jáne jemshóp óndirý ǵylymı-zertteý ınstıtýty» qurylǵan edi.

Aýyl sharýashylyǵy mınıstrligi osy ınstıtýty arqyly 2035 jylǵa deıin qoldaǵy jylqynyń genetıkalyq áleýetin selektsııalyq, tehnologııalyq ádistermen arttyrýdy kózdep otyr.