Qostanaı jastaryna Prezıdenttik kadrlyq rezervke irikteý týraly túsindirildi
Kezdesýler Qostanaı oblysynyń barlyq aýdandary men qalalarynda ótti. Oblys ortalyǵynda jastarmen Memlekettik qyzmet isteri departamentiniń basshysy Salaýat Múksimov, Jastar saıasaty máseleleri basqarmasynyń basshysy Marat Jurqabaev, QR Prezıdenti janyndaǵy Memlekettik basqarý akademııasy oblystyq fılıalynyń dırektory Aqerke Bekahmetova kezdesti.
«Memleket basshysy Qasym-Jomart Toqaev óziniń saılaýaldy baǵdarlamasynda elde prezıdenttik kadrlyq rezervin qalyptastyrý qajettiligi týraly jarııalady. Osy bastamanyń bas úılestirýshisi – QR Memlekettik qyzmet isteri agenttigi. Osylaısha, aǵymdaǵy jyldyń 1 qyrkúıeginen bastap barlyq jas qazaqstandyq irikteýden ótý úshin onlaın platforma arqyly ótinimderdi jibere bastady. Belgili bir salada jetistikteri bar jastar úshin rezervke irikteýden ótýge biregeı múmkindik týdy. Men bizdiń oblys jastaryn ózderin synaýǵa jáne rezervshiler tizimine enýge shaqyramyn», - dep Departament basshysy.
Fılıal dırektory úmitkerler arnaıy ázirlengen baǵdarlamalar boıynsha oqytylatynyn aıtty. Qatysýshylarǵa qoıylatyn negizgi talaptar PKRezerv.kz resmı saıtynda jarııalandy. Rezervke jasy 35-ten aspaǵan, jumys ótili 5 jyldan kem emes barlyq QR azamaty qatysa alady.
«Birinshi kezeń – qatysýshylardyń qujattaryn qabyldaý. Saıttyń basty betinde kandıdat ınfografıka túrinde Prezıdenttik kadrlyq rezervine irikteý úderisi týraly málimettermen tanysa alady. Ekinshi kezeńde úmitkerler test tapsyrady. Úshinshi kezeń – kandıdattardyń kóshbasshylyq qasıetterin, strategııalyq kózqaras deńgeıin, ýájdemesi men qundylyqtaryn baǵalaý. Bul úshin olar esse jazyp, ózderiniń áleýmettik mańyzdy jobalaryn tanystyrý qajet», - dedi Aqerke Bekahmetova.
Tórtinshi kezeńde úmitkerler saraptamalyq komıssııa ókilderimen áńgimelesedi. Osy kezeńge baldardyń jıyntyǵynda irikteýdiń aldyńǵy kezeńderi boıynsha eń úzdik nátıje kórsetken qatysýshylar jiberiledi.
