Qostanaı jáne Qaraǵandy oblystarynda 250-den astam adam qar qursaýynda qalyp qoıdy - TJM
ASTANA. Naýryzdyń 22-si. QazAqparat - Qostanaı jáne Qaraǵandy oblystarynda 250-den astam adam qar qursaýynda qalyp qoıdy,
dep habarlaıdy Tótenshe jaǵdaılar mınıstrliginen.
Atap aıtqanda, Qostanaı oblysyndaǵy «Qarabalyq-Slaveka» tas jolynyń 41-shi shaqyrymynda 40-qa jýyq adam mingen reıstik avtobýs pen 8 avtomashına jolda qalyp qoıǵan. Olardyń barlyǵy Bórili aýylyna jetkizilip, selolyq ákimdik ǵımaratyna jaıǵastyryldy. Jol tazalanǵannan keıin, avtobýs pen avtomashınalar baratyn jerlerine attandy. Adamdardy qaýipsiz jerge kóshirý sharalaryna «Mıhaılov orman sharýashylyǵy» memlekettik mekemesiniń 8 adamy men 3 tehnıkasy jumyldyryldy. «Qar qursaýynan qutqarylǵandardyń arasynda úsik shalǵandar jáne zardap shekkender joq», dep habarlaıdy Tótenshe jaǵdaılar mınıstrliginen.
Qaraǵandy oblysynyń Abaı aýdanyndaǵy «Abaı-Qaraqoǵa» tas jolynda da 23 avtokólik pen 80 adam qar qursaýynda qalyp qoıǵan. Kolonna Shahtınk qalasyna jóneltildi. «Abaı-Agroqalashyq» tas jolynda da 6 adam qutqaryldy, taǵy 8 adam kólikterin tastap ketýden bas tartty.
Osakarov aýdanynda, «Osakarovka-Kıevka» tas jolynyń 16-shy shaqyrymynda qar qursaýynan 9 mashına men 36 adam shyǵaryldy. Al Shet aýdanynda «Aqsý-Aıýly- Aǵadyr» jolynda 2 avtobýs pen 65 adam qar qursaýynan qutqaryldy. «Shahan-Molodetskoe» tas jolyndaǵy qar qursaýynan bir avtobýs, bir mashına jáne 32 adam qutqaryldy. Qutqarý sharalaryna Qaraǵandy oblysy Tótenshe jaǵdaılar departamentiniń 16 qyzmetkeri men 8 tehnıkasy tartyldy.
