Qostanaı jáne Aqtóbe oblystaryndaǵy Reseımen shektesetin aýmaqtarda shegirtke úıirine monıtorıng kúsheıtiledi
ASTANA. KAZINFORM - Bul týraly vıtse-premer Serik Jumanǵarınniń tóraǵalyǵymen ótken shegirtkege qarsy kúres jónindegi ortalyq jedel shtab otyrysynda AShM Memlekettik ınspektsııa komıtetiniń tóraǵasy Darhan Ábdikárimov málimdedi, dep habarlaıdy Úkimettiń baspasóz qyzmeti.
Reseı Federatsııasynyń shekaralas aýmaqtarynan shegirtkelerdiń ushý qaýpi joǵary aımaqqa: Aqtóbe oblysynyń Áıteke bı aýdany, sondaı-aq úıirli kóshi-qon joldary ótetin Qostanaı oblysynyń Jitiqara jáne Denısov aýdandary jatady. Aqtóbe oblysy shegirtkege qarsy kúres basqarmasynyń óńirlik ortalyǵynyń shtab-páterin Áıteke bı aýdanyna kóshirý týraly sheshim qabyldandy.
Qostanaı oblysynyń Jangeldi jáne Qamysty aýdandarynda kóshpeli shegirtke úıirin jedel óńdeý úshin 21 tehnıka jumys isteıdi. Shegirtkelerdiń sany kóbeıgen jaǵdaıda qosymsha tehnıka jetkizýge daıyndyq bar.
Aýyl sharýashylyǵy vıtse-mınıstri Ermek Kenjehanuly atap ótkendeı, Reseı salalyq vedomstvosymen birlesken qarsy is-qımyl sharalary pysyqtalyp jatyr. Sonymen qatar Qytaı men Ózbekstan shekarasynda zertteý jumystary júrgizilip jatyr.
Búgingi tańda shegirtke úıirine qarsy qorǵanys sharalary 1,3 mln gektarǵa nemese boljanǵan alańnyń 51,7%-yna júrgizildi. Italııalyq prýsqa qarsy hımııalyq óńdeý 920,6 myń gektarǵa nemese boljam aýmaqtyń 44,5%-yna jasaldy. Onyń ishinde Qostanaı oblysynda 184 myń gektar nemese qajetti alqaptyń 84%-y, Aqtóbe oblysynda – 431,5 myń gektar nemese 93%-y óńdeldi.
