Qostanaı ýnıversıtetine belgili akademıktiń esimi berildi
Eske salaıyq, osy jyldyń naýryz aıynda Qostanaı memlekettik pedagogıkalyq ınstıtýty ýnıversıtet mártebesine ıe boldy.
Munan soń óńirdiń zııaly qaýym ókilderi ýnıversıtetke qazaqtyń uly ǵalymy Ómirzaq Sultanǵazınniń esimin berý jóninde usynys jasaǵan bolatyn.
Kúni keshe bilim ordasyna Astanadan qýanyshty habar jetti. Qazaqstan Respýblıkasy Úkimetiniń 2018 jylǵy 16 qarashadaǵy №754 qaýlysymen joǵary oqý ornyna akademık Ómirzaq Sultanǵazınniń esimi berildi.
Ómirzaq Sultanǵazın - Qostanaı oblysynyń týmasy. Ál-Farabı atyndaǵy Qazaq ulttyq ýnıversıtetiniń matematıka fakýltetin úzdik bitirgen.
Bilim salasyndaǵy jetken jetistikteriniń arqasynda akademık dárejesine kóterildi. Qazaqstan Respýblıkasy Ulttyq Ǵylym akademııasynyń prezıdenti laýazymyna taǵaıyndaldy.
«Bizdiń kópten kútken armanymyz oryndaldy. Eń bastysy, Ómirzaq Mahmutuly dańqty jerlesimiz, qazaqtyń abyroıyn asqaqtatqan azamat. Álem tanyǵan qaıratker. Oǵan qandaı qurmet kórsetsek te jarasady. Onymen biz árqashan da maqtanamyz», - deıdi tarıh ǵylymdarynyń doktory, professor Amanjol Kúzembaıuly.
Belgili bolǵandaı, Qostanaı memlekettik pedagogıkalyq ýnıversıteti kelesi oqý jylynan bastap «Pedagogıka jáne psıhologııa» mamandyǵyna magıstratýra talapkerlerin qabyldaıdy. Al doktorantýra «Tarıh» jáne «Bıologııa» mamandyǵy boıynsha ashylmaq.