Qostanaı: Ýlanǵan sottalýshylar qaıta túrmege jetkizildi
QOSTANAI. QazAqparat - Qostanaıdaǵy ÝK-161/4 túrmesinde ýlanyp qalǵan 4 sottalýshy aýrýhanadan shyǵaryldy, dep habarlaıdy QazAqparat tilshisi oblystyq qylmystyq atqarý júıesi (QAJ) departamentiniń baspasóz qyzmetine silteme jasap.
Eske salsaq, 20 naýryz kúni Qostanaı oblysynyń Qusmuryn aýylyndaǵy ÝK-161/4 jazasyn óteýshiler mekemesinde bir top sottalýshy spırttik negizdegi hımııalyq suıyqtyqty iship, ýlanyp qaldy.
Vedomstvonyń baspasóz hatshysy Dınara Moldabaeva málim etkendeı, olar sol kúni birden Áýlıekól aýdanynyń ortalyq aýrýhanasyna jetkizildi. Medıtsınalyq sharalarǵa qaramastan 4 sottalýshynyń ómirin qutqarý múmkin bolmady. Taǵy tórteýi dárigerlerdiń kómegimen aman qaldy. Keıinirek taǵy eki sottalýshynyń ýlanyp, aýrýhanaǵa jetkizilgeni belgili boldy. Kolonııada barlyǵy 10 sottalýshy ýlanǵan.
«Jansaqtaý bólimine túsken sottalýshylar tıisti em-dom sharalaryn aldy. 26 naýryzdaǵy málimetke sáıkes, ýlanǵandar Áýlıekól aýdandyq ortalyq aýrýhanasynan shyǵaryldy. Olar jazasyn ótep jatqan kolonııaǵa jiberildi. Qazir jaǵdaılary birqalypty, dárigerlerdiń baqylaýynda. Atalǵan oqıǵaǵa qatysty qyzmettik tekserý sharalary júrgizilip jatyr», - dedi D.Moldabaeva.
Belgili bolǵandaı, sońǵy 15-20 jylda túzetý mekemesinde osyǵan uqsas tótenshe jaǵdaı tirkelmegen. Búginde munda 700 sottalýshy jazalaryn óteýde.
