Qostanaı TJD qyzmetkerlerine reseılik qutqarýshylar kómektespek
QOSTANAI. QazAqparat - Qostanaı oblysy Tótenshe jaǵdaılar departamentinde ótken jıynda aldaǵy sý tasqynyna daıyndyq jumystary pysyqtaldy, dep habarlaıdy QazAqparat tilshisi.
Qostanaı oblysy ákiminiń orynbasary Sergeı Karplıýk aıtqandaı, kóktem mezgilinde tótenshe jaǵdaılardy boldyrmaý úshin barlyq saqtyq sharalary qoldanylady.
«Negizi, jumystar sel júrý qaýpi bar eldi mekenderde ótedi. Ótken jyldardaǵy jaǵdaı qaıtalanbas úshin qazirden bastap shalǵaı aýyldar men oqý oryndaryna, mekemelerge habar berińizder. Sý tasqynyna daıyndyq sharalaryn pysyqtańyzdar. Kez kelgen jaǵdaıǵa daıyn turýymyz qajet», - dedi Karplıýk.
Qostanaı oblysy TJD bastyǵy azamattyq qorǵaý polkovnıgi Talǵat Kákimovtiń aıtýynsha, sel júrý maýsymyna daıyndalý úshin Reseı TJM jáne ózge de shekaralas aımaqtarmen birigip jumys isteý sharalary uıymdastyryldy. Olar kez kelgen sátte kómektesýge ázir.
«Búginde qala jáne aýyl ákimdikterimen birlese sý basý qaýpi bar aımaqtardy qatań qadaǵalaýǵa aldyq. Adamdardyń tegi boıynsha tizim jasalyp, jan-janýar men múlikterdi kóshirý aımaǵy anyqtaldy. Zeınetkerler, balalar, múgedekter men júkti áıelder bólek esepke alyndy. Azamattardy ýaqytsha kóshirý úshin 132 nysan daıyndaldy. Onyń 31-i - kıiz úı. Budan bólek 2997 kereýet, 6067 tósek jabdyq, 6 tonnaǵa jaqyn azyq túlik bar», - dep baıandady Talǵat Kákimov.
