Qostanaı túrmesindegi naýbaıhana 20 dúkendi nanmen qamtamasyz etedi
QOSTANAI. QazAqparat - Qostanaı oblysyndaǵy ÝK 161/12 túzeý mekemesinde jumys isteıtin kásiporyndar sany kóbeıdi, dep habarlaıdy QazAqparat.
Qostanaı oblysy ákiminiń orynbasary Marat Júndibaev Qostanaıdaǵy ÝK 161/12 túzeý mekemesine baryp, jazasyn óteýshilerdi kásipke tartý boıynsha kezdesý ótkizdi. Búginde ÝK 161/12 túrmesindegi 200 sottalýshyny Ádilet mınıstrligine qarasty «Eńbek - Qostanaı» sharýashylyq júrgizý kásiporny jumyspen qamtyp otyr. Onyń syrtynda túzeý mekemesiniń sharýashylyq ǵımaratyn 15 seriktestik jalǵa alǵan. Munda tek jazasyn óteýshiler ǵana jumys isteıdi. Marat Júndibaevtyń aıtýynsha, temir tordaǵylardy eńbekpen qamtyp, kásipke úıretý olardyń bostandyqqa shyqqannan keıingi ómirine oń yqpalyn tıgizedi.
«Oblys túrmelerinde 3 kolledj jumys isteıdi. Onyń biri - Áýlıekólde, ekeýi - Qostanaıda. Jumyspen qamtylǵandar kemi 28 myń teńge jalaqy alady. Ortasha jalaqy - 42 myń teńge. Kásippen aınalysatyn jazasyn óteýshilerge barlyq jaǵdaı jasaldy. Qazirdiń ózinde kıizder jasap, kıim tigedi, aǵash ónimderin shyǵarady. Oblys ortalyǵyndaǵy jeke kásipkerler de túrmede is júrgizýge qyzyǵýshylyq tanytyp otyr. Sebebi, bul tásil eki jaqqa da tıimdi. Kásipkerler arzan baǵaǵa oryn jaldap, kásibin dóńgeletse, sottalǵandar jumysy úshin aqsha tabady. Bastysy, bul túrmedegilerdi jaqsy baǵytqa tárbıeleıdi. Bostandyqqa shyqqan soń bastaǵan isterin jalǵastyrýǵa múmkindik alady», - deıdi Marat Júndibaev.
Túzeý mekemesi aýmaǵynda 19 kásiporyn jumys isteıdi. Aǵash, temir óńdeý, «shlakoblok», «brýschatka», metall buıymdaryn jasaıtyn tseh ashyldy. Keshki mektep jumys isteıdi. 70-ke jýyq adam bilim alady. Qurylys jáne turmystyq qyzmet kórsetý kolledjiniń mamandary sabaq beredi. Sottalǵandardyń barlyǵy jumys berýshilermen kelisim-shartqa otyrǵan. Keıbiri tapqan paıdasyn jaqyndaryna jiberedi.
«Túzeý mekemesi janynda shaǵyn tigin tsehtary, ustalyq sheberhanalar men naýbaıhanalar bar. Tek naýbaıhananyń ózi qaladaǵy 20 azyq-túlik dúkenin nanmen qamtamasyz etip otyr. Bir táýlikte 2700 bólke nan pisiredi. Buǵan qosa «Adler-KST» seriktestigi 20 jyldan beri astyq óńdeýmen aınalysyp keledi. Seriktestik quramynda 21 jazasyn óteýshi bar. Olar burshaq jarmasyn Tájikstan, Aýǵanstan, Iranǵa eksportqa shyǵarady», - dedi ÝK 161/12 túzeý mekemesiniń bastyǵy Qumarbek Ibraev. 
Marat Júndibaev aıtqandaı, jazasyn óteýshilerdiń sapaly bilim alýy mańyzdy. Sondyqtan bilim basqarmasymen kelise otyryp, túzeý mekemesinde qosymsha pánder oqytylady.
