Qostanaı týrızmin damytýdyń jospary jasaldy

QOSTANAI. QazAqparat - Qostanaı oblysynyń týrıstik keshenin damytý maqsatynda 7 memorandýmǵa qol qoıyldy. Bul týraly Qostanaı oblysy ákimdiginiń kásipkerlik jáne ındýstrıaldyq-ınnovatsııalyq damý basqarmasy basshysynyń orynbasary Roza Gorıannaıa málimdedi, dep habarlaıdy QazAqparat tilshisi.

Basqarma málimetine súıensek, ótken jyldarmen salystyrǵanda 2017 jyldyń birinshi jarty jyldyǵynda týrızm salasyndaǵy negizgi kórsetkishterdiń ósý úrdisi baıqaldy. Oblysta saýyqtyrý týrızmi belsendi damyp keledi.

«Óńirdiń týrıstik áleýetin kórsetý úshin orys, aǵylshyn, qytaı tilderinde beınerolık ázirlendi. Buǵan qosa, týrıstermen jumys isteıtin gıd, ekskýrsııashylardy daıyndaıtyn semınar ótkizdik. Búginge deıin 42 adam dáris aldy. Jalpy, oblystyń 30 qasıetti ornyna baryp, qazirgi jaǵdaıyn baqylap qaıttyq», - dedi Gorıannaıa.

Eske salsaq, bıyl «Qostanaı. Týrızm-2017» forýmy ótken bolatyn. Basqosý barysynda Torǵaı geolıfterin týrıstik maqsatta paıdalaný usynylǵan-dy.

«2018 jyly Torǵaı geoglıfterine sapar uıymdastyrylyp, Qazaqstannyń qasıetti oryndaryn shet elderge tanytý úshin halyqaralyq forým ótkiziledi. Memlekettik-jekeshelik áriptestik salasynda kóptegen jobany qolǵa alamyz. Qazaqstandaǵy ańshylyq-trofeılik týrızmdi damytý úshin bizdiń oblys qanatqaqty joba esebinde tańdaldy. Sondaı-aq, aımaqtyń týrıstik keshenin damytý maqsatynda Egıpet, Reseı jáne Qazaqstannyń týrıstik uıymdary 7 memorandýmǵa qol qoıdy. Tıisinshe, biz Qostanaıdyń týrıstik baǵytyn kórsetý úshin 2018-2022 jyldardy qamtıtyn jospar jasadyq», - dep atap ótti Roza Gorıannaıa.

Atalmysh jospar 73 baǵyttan turady. Muny ázirleý úshin 5 mln teńge bólinse, onyń tek 2 mln 190 myń teńgesi jumsaldy. Joba jetekshisi Evgenıı Fıkstiń sózinshe, Qostanaı, Rýdnyı, Lısakov qalalary men Qostanaı, Meńdiqara, Altynsarın aýdandarynyń týrıstik áleýeti joǵary. Al Jangeldın jáne Amangeldi aýdandarynda kórneki oryndardyń kóp bolǵanymen, baılanys, ıaǵnı, ǵalamtorǵa shyǵý múmkindigi joq.

«Búginde týrızmdi ilgeriletýdiń negizgi baǵyttary anyqtaldy. Olardy ekologııalyq, mádenı-tanymdyq, emdeý-saýyqtyrý, ańshylyq-trofeılik klasterlerge jiktedik. Biz usynǵan jospardy júzege asyrý úshin jergilikti bıýdjetten 4 mlrd teńge shamasynda qarajat kerek», - dedi Fıks.   

Oblys ákimi Arhımed Muhambetov jobanyń jetispeıtin tustary bar ekenin aıtty. Sol sebepti, tıisti mınıstrlikpen birlese jumys isteýdi tapsyrdy.