Qostanaı turǵynynan eki dóner suraǵan polıtseı 1,5 mln teńge aıyppul tóleıdi
QOSTANAI. QazAqparat - Qala turǵynynan materıaldyq syıaqy alǵan qostanaılyq polıtseı ákimshilik jaýapqa tartyldy, dep habarlaıdy QazAqparat oblystyq sybaılas jemqorlyqqa qarsy kúres departamentiniń baspasóz qyzmetine silteme jasap.
Іs derekterinde kórsetilgendeı, 2017 jyldyń 13 mamyrynda 23 jastaǵy Qostanaı qalasy ІІB jol-patrýldik polıtsııa qyzmetkeri Mıras Núrpeıisov jol erejesin buzǵan turǵyndy ákimshilik jaýapkershilikten bosatqan. Biraq, esesine ol zań buzýshydan bireýi 450 teńge bolatyn eki dóner taǵamyn talap etken.
«Tártip buzǵan kólik júrgizýshisi taǵamdy polıtseıge Jeńis parkiniń mańynda bergen. Munyń barlyǵy beınejetonǵa jazyldy. Birinshi sot otyrysynda polıtsııa qyzmetkeri óz kinásin moıyndaǵan joq. Alaıda, is kýágeri retinde tirkelgen jol erejesin buzǵan turǵyn polıtseıdiń kóligine eki dóner taǵamyn salǵanyn aıtty», - dedi vedomstvonyń baspasóz hatshysy Aıda Bajırova agenttik tilshisine.
Osy iske qatysty beınefonografııalyq zertteý júrgizilip, Núrpeıisovtiń daýysy anyqtaldy. Nátıjesinde, ol kinásin tolyqtaı moıyndady. Polıtseıdiń qorǵaýshysy jazany jeńildetýdi surady.
Búgin Mıras Núrpeıisov ákimshilk jaýapkershilikke tartyldy. Ol memleket qazynasyna 1443000 teńge aıyppul tóleıdi.
