Qostanaı turǵyny úsh adamdy aıýandyqpen óltirgen
QOSTANAI. QazAqparat - Qostanaı oblysy mamandandyrylǵan aýdanaralyq sotynda úsh adamdy óltirgen aıyptalýshyǵa qatysty úkim shyqty, dep habarlaıdy QazAqparat tilshisi.
Esterińizge sala keteıik, 2017 jylǵy 14 qańtarda polıtsııa qyzmetkerleri 26 jastaǵy Qostanaı turǵyny Sergeı Polıanıchkony ustady. Ol eki jas jigitti óltirip, múshelep tastaǵany úshin aıyptalǵan.
Tártip saqshylary byltyr 27 jastaǵy Aleksandr Samsonovtyń múrdesin tapqan. Kúdikti bul qylmysyn moıyndap, 2013 jyly Danıl Klenko esimdi jigitti de aıýandyqpen óltirgenin aıtty. Ekeýiniń múrdelerin kóshedegi dárethanalarǵa kómgen.
Kúdikti saraptama nátıjeleri boıynsha áreketke qabiletsiz dep tanyldy. Alaıda jábirlenýshi tarap saraptama nátıjelerimen kelispeı, shaǵym túsirdi.
Sot otyrysynda Sergeı Polıanıchkonyń 2015 jyly taǵy bir er adamdy óltirgeni belgili boldy. Alaıda onyń súıegi tabylmaı, qylmystyq is qozǵalǵan joq.
«QR QK 16-babyna sáıkes Polıanıchko qylmystyq jaýaptylyqtan bosatylsyn. Oǵan medıtsınalyq sıpattaǵy májbúrleý sharalary qoldanylyp, psıhıatrııalyq statsıonarda qarqyndy baqylaýǵa alynsyn», - degen úkimdi oqydy sýdıa Abaı Raısov.
Sot zalynda Sergeı Polıanıchko kisi óltirý arqyly rahat tabatynyn aıtty. Negizinen, Qostanaı oblystyq psıhıatrııalyq aýrýhanasynyń dárigerleri oǵan naqty dıagnoz qoıa almaı, Talǵar mamandandyrylǵan psıhıatrııalyq aýrýhanasyna jibergen. Psıhıatrlardyń sheshimimen ol áreketke qabiletsiz dep tanyldy.
