Qostanaı turǵyny «Turǵyn úı qurylys jınaq banki» arqyly alǵan páteriniń qyzyǵyn kóre almaı keledi
ASTANA. QazAqparat - Qostanaı qalasyndaǵy Tekstılşıkter kóshesiniń boıynda ornalasqan №10A úıdiń turǵyndary «VIST» qurylys fırmasynyń ústinen №2 qalalyq sotyna shaǵym túsirdi, dep jazady «Qostanaı tańy» gazeti.
Shaǵymdanýshylardyń biri, talapker T. 2013 jyly atalǵan toǵyz qabatty úıden «Turǵyn úı qurylys jınaq banki» arqyly bir bólmeli páterge qol jetkizgen. Biraq, búginde ol ıpotekaǵa alǵan páteriniń qyzyǵyn kóre almaı otyrǵanǵa uqsaıdy. Óıtkeni, ár kóktem saıyn erigen qar sýy men jaz, kúz aılaryndaǵy tolassyz jańbyrdyń saldarynan ári merdigerlerdiń saldyr-salaqtyǵynan páteriniń tóbesinen sý aǵyp, yńǵaısyzdyq týdyratyn kórinedi.
Búginde syz tartqan páterde turý múmkin emes ári tóbeden aqqan sýdyń saldarynan elektr jaryǵyn da durys paıdalana almaı otyrǵan kórinedi.
Talapkerdiń sózinshe, bul jaǵdaı kezinde úıdiń shatyryn durys salmaǵandyqtan oryn alyp otyr. Páter ıeleri osy máselemen merdigerlik uıymǵa birneshe ret habarlasqan, al olar bul isti osy úıdiń jeke páter ıeleriniń kooperatıvine silteıdi.
Aqyry eshqandaı nátıje shyqpaǵan soń talapkerler sotqa júginýge májbúr bolǵan. Endi páterler ıeleri sot arqyly buǵan jaýapty «VIST» qurylys fırmasynyń úıdiń shatyry men páterdiń tóbesin jóndep berýge mindetteýdi jáne úıdi qabyldap alýda nemquraılylyq tanytqan tıisti oryndardan 300 myń teńge moraldyq shyǵyn tóleýdi talap etti. Bul iske qatysty alǵashqy tyńdalym aǵymdaǵy jyldyń 1 tamyzyna belgilengen.
