Qostanaı turǵyny nan ishinen aǵash jańqa taýyp aldy
QOSTANAI. QazAqparat - Qostanaı turǵyny Arına Velıchko dúkennen satyp alǵan nannyń ishinen aǵash jańqasyn tapty, dep habarlaıdy QazAqparat.
Arına Velıchko baton nandy 5-shaǵyn aýdandaǵy dúkenderdiń birinen satyp alǵan. Nan polıetılendi qapshyqqa oraýly bolǵan. Keshkilik otbasy ol nannyń jartysyn jegen. Al tańerteń nannyń qalǵan bóliginen býterbrod ázirlemek bolǵan otbasy múshesi tilim ishinen aǵash jańqasyn taýyp alady.
«Nandy 18 qazan kúni «Aına» dúkeninen satyp aldyq. Nan ishinen 5 sm-deı jańqa tabyldy. Turǵyndardy barynsha abaı bolýǵa shaqyramyz», - dedi Arına Velıchko.
Eske salsaq, jaqynda Qostanaıda 14 jastaǵy oqýshynyń tamaǵyna aǵash jańqasy turyp qalǵan bolatyn. Bógde zat otanyń kómegimen alyndy.
Keıin SES jańqa shyqqan nan óndirýshi mekemege tekseris júrgizip, zańbuzýshylyqty tirkegen.
