Qostanaı turǵyny kópirden sekirgen qyzdy aman alyp qaldy
QOSTANAI. QazAqparat – Qostanaı turǵyny Vladımır Aksenov Tobyl ózenine sekirip ketken qyzdy aman alyp qaldy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, oqıǵa 13 sáýir kúni keshki 21:00-de bolǵan. 36 jastaǵy qala turǵyny Vladımır Aksenov otbasymen birge Tobyl ózeniniń jaǵalaýynda serýendep júrgen.
«Kenet «meni qutqaryńdar!» degen daýysty estidim. Bastapqyda jas jigit shyǵar dep oıladym. Jubaıymdy oramal alyp kelý úshin úıge jiberdim de, daýys shyqqan jaqqa qaraı júgirdim. Qyz balanyń sýǵa túsip ketkenin kórdim. Oılanbastan muzy endi erip jatqan sýǵa men de sekirdim. Boıjetken jaldaý bilmeıtinin aıtty. Oǵan deıin júzip bardym da, aman-esen jaǵaǵa alyp shyqtym», - deıdi Vladımır Aksenov.
Osy ýaqytta oqıǵa ornyna polıtsııa patrýlderi kelip jetken. Polıtsııa leıtenanty Dúısenbaı Qoıanbaev pen aǵa leıtenant Bákijan Maqsat ta kómek kórsetti. Odan ári dárigerler boıjetkendi aýrýhanaǵa jetkizdi.
Oblystyq polıtsııa departamentiniń basshylyǵy Vladımır Aksenovke QR ІІM-niń móri bar saǵat tabys etip, syn sátte kórsetken erligi úshin alǵys bildirdi.
