Qostanaı turǵyny gazben atatyn revolver satpaq bolǵan
QOSTANAI. QazAqparat - Gazdy revolver satýǵa tyrysqan Qostanaı oblysynyń turǵyny jazaǵa tartyldy, dep habarlaıdy QazAqparat oblystyq sottyń baspasóz qyzmetine silteme jasap.
Qamysty aýdandyq sotynda tirkelmegen qarý-jaraqty zańsyz satpaq bolǵan er adamǵa qatysty ákimshilik is qaraldy. Ol QR ákimshilik quqyqbuzýshylyq týraly kodekstiń 482-baby, 1 bóligi boıynsha aıyptaldy.
«Saraptama qorytyndysyna sáıkes, bul qarýdyń 9 mm kalıbrli «SM 2000» gaz revolveri ekeni anyqtaldy. Sondaı-aq, revolverdiń Germanııada jasalǵany, tıisti nómiri jáne tehnıkalyq jaǵynan jóndelgeni belgili boldy», - delingen habarlamada.
Sot otyrysynda er adam bul tapanshany úıinen taýyp alǵanyn, ákesine tıesili ekenin aıtty. Qarýdy ótkizip, alkogol ónimderin satyp alǵysy kelgenin jetkizdi.
Sot qaýlysymen oǵan ákimshilik jaza túrinde aıyppul taǵaıyndaldy. Ol memleket tarapyna 45380 teńge aıyppul tóleıdi. Atalǵan qarý tárkilendi.
Sot úkimi zańdy kúshine engen joq.
