Qostanaı turǵyny esirtkini ájethana edeniniń astyna jasyryp kelgen
QOSTANAI. QazAqparat - Qostanaılyq tártip saqshylary iri kólemde esirtki saqtaǵan qylmyskerlerdi qolǵa túsirdi, dep habarlaıdy QazAqparat oblystyq PD baspasóz qyzmetine silteme jasap.
Qostanaı oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri jedel-izdestirý sharalaryn júrgizý barysynda eki kúdiktini ustap, olardan bir jarym kılogrammnyń ústinde geroın tárkiledi.
«47 jastaǵy er adam jáne 35 jastaǵy áıeldi qolǵa túsirý operatsııasy Qostanaı qalasynyń shetindegi Kıevskıı aýylynda júrgizildi. Kúdiktiler esirtki zatyn aılaly tásilmen saqtaǵan. Daladaǵy ájethana edeniniń astynda qupııa qoıma jasaǵan. Esirtkini shegege ilingen pakette saqtaǵan. Tárkilengen geroınnyń jalpy salmaǵy 1 kılogramm 600 grammdy qurady», - dedi oblystyq PD baspasóz qyzmetiniń jetekshisi Irına Bejenar agenttik tilshisine.
Búginde osy fakti boıynsha Qazaqstan Respýblıkasynyń Qylmystyq kodeksi 297 baby, 3 bóligimen («Esirtki zattardy ótkizý maqsatynda zańsyz saqtaý») sotqa deıingi tergeý júrgizilýde. Atalmysh baptyń sanktsııasy múlikti tárkileýmen qatar, 10 jyldan 15 jylǵa deıingi merzimge bas bostandyǵynan aıyrýdy kózdeıdi.
Kúdiktiler ýaqytsha ustaý ızolıatoryna qamaldy.
