Qostanaı turǵyny bir aıda elordalyqtardyń 8 kóligin urlaǵan
QOSTANAI. QazAqparat – Nur-Sultan qalasynyń polıtseıleri segiz avtokólikti urlady degen kúdikpen Qostanaı oblysynyń turǵynyn ustady, dep habarlaıdy QazAqparat.
Qostanaı oblystyq Polıtsııa departamenti baspasóz qyzmetiniń aqparatyna súıensek, Nur-Sultan qalasynyń turǵyny jalpy quny 285 myń teńge turatyn jeke múliktiń urlanǵany týraly aryzdanǵan. Jábirlenýshiniń aıtýynsha, kúdikti aqsha, uıaly telefon, qujattar men kıim-keshekterdi urlap ketken. Jedel-izdestirý is-sharasy barysynda kúdikti elordadan ustaldy. Ol Qostanaı oblysynyń 27 jastaǵy turǵyny bolyp shyqty.
«Tergeý sharalaryn júrgizý kezinde polıtsııa qyzmetkerleri jeke múlik urlyǵynan basqa, kúdikti 2019 jyldyń tek qazan aıynda segiz avtokólikti aıdap ketkenin anyqtady. Olardyń arasynda VAZ, Volkswagen Golf, GAZ, Mazda markaly kólikter bar. Urlanǵan mashınalar ıelerine qaıtaryldy», - delingen vedomstvonyń aqparatynda.
Qazir osy derek boıynsha sotqa deıingi tergeý júrgizilýde. Ustalǵan azamattyń basqa da qylmystarǵa qatystylyǵy tekserilip jatyr.
