Qostanaı turǵyny balasynyń emdelýine kómektesken polıtseıge alǵys aıtty
QOSTANAI.QazAqparat – Qostanaı oblysy Qarasý aýdanynyń turǵyny balasynyń emine kómek kórsetken tártip saqshysyna alǵys aıtty, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Qarasý aýdandyq polıtsııa bólimine jergilikti turǵyn Tatıana Alpysbaeva kelip, ýchaskelik ınspektor Baqytbek Hamıdýllınge alǵysyn bildirdi. Tártip saqshysy birneshe jyl boıy zeınetkerdiń otbasyna kómektesip kelgen. 70 jastaǵy zeınetker 45 jastaǵy jumyssyz ulymen birge turady. Alaıda balasy jıi ishimdik iship, urys shyǵarady. Anasy osyndaı sátte birden ýchaskelik polıtsııa qyzmetkerin shaqyrady.
«Zeınetker polıtsııa kapıtany Baqytbek Hamıdýllınnen ulyn alkogolden májbúrlep emdeýge kómektesýin surady. Polıtseı barlyq jaǵdaıdy bilip, ony nazardan tys qaldyrmady. B. Hamıdýllın qysqa merzimde óziniń «qamqorlyǵyndaǵy» er adamdy maskúnemdikten emdeý úshin barlyq qajetti qujattardy jınap, oblys ortalyǵyna narkologqa apardy. Materıaldar sotqa jiberilip, endi aýyl turǵyny jarty jyl boıy Qostanaı qalasynda emdeletin bolady. 70 jastaǵy zeınetker tártip saqshysyna kórsetken kómegi úshin alǵys bildirdi», delingen polıtsııanyń baspasóz habarlamasynda.
