Qostanaı turǵyndarynyń kommýnaldyq qyzmetke bereshegi jarty mıllıard teńgeden asqan
QOSTANAI. QazAqparat - Qostanaı oblysy ákiminiń qatysýymen ótken apparat jıynynda kommýnaldyq qyzmetke bereshek turǵyndardyń máselesi talqylandy, dep habarlaıdy QazAqparat.
Qalalar men aýdandarda kommýnaldyq qyzmetter boıynsha júrgizilip jatqan jumystarǵa qaramastan, qaryz kólemi azaımaı tur. 2019 jylǵy 1 sáýirdegi jaǵdaı boıynsha, turǵyndardyń kommýnaldyq qyzmetterge qaryzy 569,3 mln teńgege jetken. Máselen, Qostanaı qalasy turǵyndarynyń bereshegi 380,4 mln teńge bolsa, jitiqaralyqtar 81,6 mln teńge qaryz. Bul máselege Qostanaı jylý-energetıkalyq kompanııasynyń (QJEK) ókilderi oblys ortalyǵy turǵyndarynyń jylý men ystyq sýǵa qaryzdarynyń kóbeıýine alańdaýly. Monopolısterdiń ýájine qulaq asar bolsaq, tólemderdiń der kezinde júrgizilmeýi kompanııa jumysyna nusqan keltirýde. Al qaryzdyń qordalanýy qubyr jóndeý, aldaǵy qysqa ázirlik naýqanyna kesirin tıgizýi múmkin.
«2019 jyldyń 1 qańtarynan bastap kommýnaldyq qyzmetter tarıfteri iri sýbektiler boıynsha 1%-dan 14%-ǵa deıin tómendedi. Qýattylyǵy az sýbektilerdegi tarıfter 2018 jyldyń deńgeıinde saqtaldy. Degenmen, olar elektr energııasy baǵasynyń tómendeýine baılanysty jumys júrgizýde. Sáýir aıyndaǵy málimet boıynsha, turǵyndardyń jylýǵa qaryzy 419,2 mln teńgege jetti. Al sý jáne aǵyn sýlardy burý - 73 mln teńge, elektr energııasy úshin - 55,7 mln teńge, gazǵa 21,4 mln teńge bereshek. Aýdandar boıynsha eń joǵary qaryz Áýlıekól - 13,6 mln teńge, Qostanaı - 10,8 mln teńge jáne Qarabalyq - 4,1 mln teńge», - dedi oblys ákiminiń orynbasary.
Jylý maýsymyn qaryzsyz, oıdaǵydaı aıaqtaýǵa talpynǵan kompanııa ókilderi boryshkerlermen jumysty barynsha jandandyrýdy jón kórgen. Atap aıtqanda, qyzmetkerler qaryzy bar adamdardyń páterlerin aralap, eskertý paraqtaryn taratýda. Al ony pysqyrmaǵandarmen kúresýge sot oryndaýshylary jumyldyrylǵan. Jeke sot oryndaýshylary boryshkerlerdiń dúnıe-múlikterin buǵattap, boryshkerlerdiń ózderin shekaradan attap baspaıtyndaı etip shekteý qoıyp jatyr. Keıbiriniń múlikterin sot sheshimine saı tárkilep, kompanııanyń kádesine jaratqan.
Arhımed Muhambetov aýdan-qala ákimderine qaryzy bar kommýnaldyq menshik ıelerin qatań baqylaýǵa alýdy tapsyrdy.
