Qostanaı turǵyndarynyń 73 paıyzy elektrondy densaýlyq tólqujatyna ıe
Óńirlik vedomstvoaralyq jumys toby memlekettik qyzmetterdiń sapasyn arttyrý maqsatynda quryldy. Búgingi jıynda «Azamattarǵa arnalǵan úkimet» memlekettik korporatsııasy fılıalynyń ókili Aıan Súleımenov halyqty elektrondy memlekettik qyzmettermen qamtý boıynsha ótken toǵyz aıdyń qorytyndysyn jarııa etti.
«Qostanaı oblysynda densaýlyq saqtaý salasyn tsıfrlandyrý úrdisi qarqyndy. Memlekettik korporatsııa qyzmetkerleri ár óńirge shyǵyp, densaýlyq saqtaý, bilim berý mekemelerine taldaý júrgizip otyrady. Jyl ishinde 16 myń qostanaılyq ETsQ aldy. Al mobıldi azamattar bazasynda 10 myńnan astam adam tirkeldi», - dedi Aıan Súleımenov.
Qostanaı oblysyndaǵy 864 myń turǵynnyń 73 paıyzy elektrondy densaýlyq tólqujatyna ıe. Búginde densaýlyq saqtaý júıesin tsıfrlandyrýdyń aımaqtyq jospary ázirlendi. Endi turǵyndar burynǵydaı ambýlatorııalyq kartany paıdalanbaıdy, dáriger qabyldaýyna elektrondy túrde jazylady. Qaǵazbastylyqty joıý boıynsha jumystar bilim, quqyq qorǵaý salalarynda da jemisti júrgizilip keledi.
Eske salsaq, Elbasy bıylǵy Joldaýynda 2019 jyly kórsetiletin memlekettik qyzmetterdiń 80 paıyzy, al 2020 jyly keminde 90 paıyzy elektrondy formatqa kóshiriletinin aıtqan bolatyn.
Jıynǵa qatysýshylar memqyzmet salasynda anyqtalǵan quqyqbuzýshylyqtardy da talqylady. QR Memlekettik qyzmet isteri jáne sybaılas jemqorlyqqa qarsy is-qımyl agenttigi oblystyq departamenti zańǵa qaıshy áreketterdi joıý boıynsha usynystar engizdi.
Shaǵymdardyń kóbi Qostanaı qalasy jáne Qostanaı aýdany ákimdiginiń laýazymdyq tulǵalaryna kelip túsken. Qostanaı qalasy ákimi apparatynyń basshysy Aıdar Berdiqojaev memlekettik organdardyń jumysyndaǵy kemshilikterdiń bar ekenin, aldaǵy ýaqytta zańnamanyń qatań saqtalýyn jeke osy máseleni baqylaýyna ustaıtynyn aıtyp ótti. Máselen, oblystyq departamentke jer ýchaskelerin berýge baılanysty shaǵymdar kóptep túsedi. Osyǵan deıin turǵyndardyń tek 62%-nyń ótinishi qanaǵattandyryldy.
Jıynda belgili bolǵandaı, jer ýchaskelerinde zańsyzdyqtarǵa jol bergen Qostanaı aýdandyq jer qatynastary bóliminiń basshysy men bas mamany laýazymdarynan bosatylǵan.
Oblystyq Departamenti basshysynyń orynbasary Ashat Eskendirovtiń sózinshe, memlekettik qyzmetshilerdiń jazalanýy qyzmet sapasynyń jaqsarǵanyn kórsetpeıdi. Ol ishki baqylaý arqyly zańbuzýshylyqtardyń aldyn alý, ýaqtyly ádistemelik kómek kórsetý qajettigine toqtaldy.
