Qostanaı turǵyndary 600 mln teńgeniń aıyppulyn tólemeı otyr
ASTANA. QazAqparat - Qostanaı oblysynyń turǵyndary túrli zańbuzýshylyqtar úshin salynǵan aıyppuldardy tóleýge asyqpaıdy, dep jazady Alau.kz saıty.
Tek bıylǵy jyldyń ózinde jeke sot oryndaýshylarynda ákimshilik aıyppuldardy tóleý jónindegi 41 myń atqarý qujattary aıaqtalmaı qalyp otyr. Osynyń nátıjesinde 800 mln teńge aıyppuldyń tek 200 mln teńgesin ǵana tóletýdiń múmkindigi týǵan.
Eger buryndary salynǵan aıyppuldyń nebári 100 teńgesi tólenbaı qalsa, elden shyǵýǵy tyıym salynatyn. Qazir talap ózgerdi. Endi aıyppul kólemi 45 myń teńgeden asatyn bolsa ǵana azamattar ǵana shetelge shyǵa almaıdy.
«Aıyppuldaryn tólemegen adamdardy buryn poıyzdar men ushaqtardan jáne ózge de kólikterden shyǵaryp tastap, ótkizý beketterinen nemese shekaradan ótkizbeıtin. Eshqaıda shyǵa almaǵan soń azamattar turǵylyqty jerine qaıta oralýǵa májbúr bolady»,-dedi Qostanaı oblystyq Ádilet departamenti bastyǵynyń orynbasary Asqat Júnisov.
Onyń aıtýynsha, aıyppuldardyń tólenbeý sebebi kóbine ol týraly habardyń ıesine ýaqytynda jetpeýimen baılanysty. Poshta qyzmetkeri aıyppul salynǵany týraly qujatty azamattyń turǵylyqty mekenjaıyna alyp kelip beredi. Al ol azamattyń mekenjaıy ózgerip ketýi ábden múmkin. Bas prokýratýra ókilderi bolsa, ádettegi hat salynatyn jáshikti elektrondy jáshikpen almastyrýdy kózdep otyr. Bul jaǵdaıda júrgizýshige tegin elektrondy poshta ashý kerek bolady jáne ol kólik nómiri men JIN-ge balanystyrylady. Jol erejesi buzý faktisi nemese baqa da jaǵdaıda aıyppul salynatyn bolsa, elektrondy poshtaǵa hat keledi.
Sonymen qatar árbir azamat Ádilet mınıstrliginiń arnaıy saıtyna kirip, qaryzdar azamattardyń tiziminen óziniń aty-jóniniń bar-joǵyn teksere alady. Ol úshin tek JIN (IIN) engizseńiz bolǵany.
