Qostanaı:Turǵyn úı-kommýnaldyq sharýashylyq bóliminiń eks-basshysy qamaýǵa alyndy
QOSTANAI. QazAqparat – Búgin Qostanaı qalalyq №2 sotynda Qostanaı qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń burynǵy basshysy Alekseı Tarasovqa úkim kesildi, dep habarlaıdy QazAqparat.
Sot otyrysy onlaın túrde ótti. Alekseı Tarasovqa QR QK «Aýyr zardaptarǵa ákep soqqan laýazymdyq ókilettigin teris paıdalaný» jáne «Zańdy kásipkerlik qyzmetke kedergi jasaý» baptary boıynsha aıyp taǵyldy.
Sot Alekseı Tarasovty 3 jylǵa 6 aıǵa bas bostandyǵynan aıyrdy. Ol jazasyn qaýipsizdigi eń tómengi qylmys kolonııasynda óteıdi. Eks-basshy sot zalynda qamaýǵa alyndy.
Іs derekterine súıensek, A.Tarasov TKSh bóliminde basshy bolyp turǵanda memlekettik satyp alý kezinde zańsyzdyqqa jol bergen. Ol qaladaǵy ortalyq saıabaqtyń kireberisin 80 mln teńgege dekoratıvtik bezendirý úshin jeke kásipkermen birjaqty, tikeleı shart jasasqan. Keıin shartty buzyp, «Memlekettik satyp alý týraly» Zańnyń talaptaryna qaramastan, ol merdigerdiń atyna nysandaǵy jumystardy toqtatý týraly habarlama jiberip otyrǵan. Bul rette tapsyrys berýshi tarapynan jumystyń toqtatylý sebepteri kórsetilmegen.
