Qostanaı turǵyny janjal kezinde burynǵy áıelin atyp óltirdi

QOSTANAI. KAZINFORM – Qostanaı qalasynda 37 jastaǵy áıeldiń ólimine baılanysty qylmystyq is qozǵaldy. Kúdikti retinde onyń burynǵy kúıeýi tanylyp otyr. Ol oqıǵa bolǵannan keıin óz erkimen polıtsııaǵa kelip, kinásin moıyndaǵan. Bul týraly Kazinform agenttiginiń tilshisi habarlady.

Qaıǵyly oqıǵa oblys ortalyǵynyń yqshamaýdandarynyń birinde bolǵan. Áleýmettik jelilerde taraǵan aqparatqa sáıkes, er adam memlekettik qurylymdardyń birinde qaýipsizdik salasynda jumys istegen bolýy múmkin.

Qylmysty jasaǵannan keıin ol ózi polıtsııa bólimine baryp, bolǵan jaǵdaı týraly habarlaǵan.

Qostanaı oblysy polıtsııa departamentiniń baspasóz qyzmetiniń málimetinshe, kúdikti ýaqytsha ustaý ızolıatoryna qamalǵan.

— Aldyn ala derekter boıynsha, áıel turmystyq janjal barysynda alǵan oq jaraqatynan kóz jumǵan, — dep naqtylady vedomstvo ókilderi.

Kúdiktiniń atyna tirkelgen ańshylyq myltyq tárkilendi.

Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan tergeý-operatıvtik sharalar júrgizilip jatyr.

Aıta keteıik, buǵan deıin Talǵarda jylqy satý máselesine baılanysty janjal adam ólimimen aıaqtalǵan edi.