Qostanaı turǵyny úıiniń jertólesine tyıym salynǵan ósimdikter ósirgen

QOSTANAI. KAZINFORM – Qostanaı oblysy Polıtsııa departamentiniń esirtki qylmysyna qarsy is-qımyl basqarmasy qyzmetkerleri quramynda esirtki zattary bar ósimdikterdi zańsyz ósirý faktisin anyqtap, jolyn kesti, – dep jazdy Polisia.kz.

Jedel is-sharalar barysynda qaladaǵy shaǵyn aýdandardyń birinde úı jaǵdaıyndaǵy fıtozerthana tabyldy. Jeke úıdiń jertólesinde er adam kannabıs ósirýge arnalǵan bútin bir júıe uıymdastyrǵan. Ol jerde qosymsha jaryq beretin shamdar, jeldetkishter, aýany ylǵaldandyrǵysh, termometr, qýat kózderi jáne aýa súzgisi ornatylǵan. Munyń barlyǵy tyıym salynǵan ósimdikterdiń ósýine qolaıly jaǵdaı jasaý úshin paıdalanylǵan.

Polıtseıler 16 túp qarasora ósimdigin tárkiledi, olardyń jalpy salmaǵy 5 keliden asty. Budan bólek, medıtsınalyq kýálandyrý qorytyndysyna sáıkes, ustalǵan adamnyń aǵzasynan kannabınoıdter qoldanǵany anyqtaldy.

Aldyn ala derekter boıynsha, er adam bıyl kóktemde messendjer arqyly tuqym satyp alyp, úı jaǵdaıynda ózi ósire bastaǵan. Onyń aıtýynsha, ósimdikterdi ydystarǵa otyrǵyzyp, arnaıy jabdyqtalǵan shatyrda baptaǵan.

Qazir quramynda esirtki zattary bar ósimdikterdi zańsyz ósirý faktisi boıynsha qylmystyq is qozǵaldy. Qoldanystaǵy zańnamaǵa sáıkes, kúdikti eki jylǵa deıin bas bostandyǵynan aıyrylýy múmkin.

Quqyq qorǵaý organdar esirtki zattaryn ósirý, saqtaý jáne taratý, tipti úı jaǵdaıynda bolsa da, qylmystyq jaýapkershilikke ákep soǵatynyn eske saldy. Zańdy buzǵan mundaı «tájirıbeler» aýyr saldarǵa ákelýi múmkin.

Aıta keteıik, Jambyl oblysynda úsh myń tonnadan astam jabaıy qarasora joıyldy.