Qostanaı turǵyny Astanadaǵy klınıkalardyń birinde emdeý protsedýrasynan soń komaǵa tústi
ASTANA. KAZINFORM – Qostanaılyq qyz Astanada jeke klınıkalardyń birinde kosmetologııalyq protsedýradan ótken soń komaǵa tústi. Atalǵan fakti boıynsha tekserý taǵaıyndaldy.
Osyndaı oqıǵa bolǵanyn QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń Astana qalasy boıynsha departamentiniń ókilderi rastady.
-2025 jyldyń maýsymynda departament tarapynan jeke klınıkaǵa táýelsiz sarapshylar komıssııasyn jiberý jóninde hat joldanǵan. Ondaǵy maqsat – patsıenttiń densaýlyǵyna zııan keltirý jaǵdaıy bolǵan-bolmaǵanyn anyqtaý edi,-dep habarlady joldanǵan saýalǵa.
Klınıka ókilderi alda osyndaı komıssııa ótetinin rastady. Saraptama qorytyndysy boıynsha jasalǵan tujyrym shaǵym ıesi men departamentke joldanady.
Buǵan deıin habarlanǵandaı, komaǵa túsken qyz — 2025 jyldyń sáýir aıynda muryn perdesin túzetý operatsııasyn jasaǵan Qostanaı qalasynyń turǵyny. Sol ýaqyttan beri naýqas es-tússiz jatyr.
«Tekserý nátıjelerimen kelispegen jaǵdaıda, «Halyq densaýlyǵy jáne densaýlyq saqtaý júıesi týraly» kodekstiń 30-babyna sáıkes, patsıenttiń týystary Astana qalasy boıynsha komıtet departamentine júginýge quqyly. Mundaı ótinish negizinde medıtsınalyq uıymǵa jospardan tys tekseris júrgizilýi múmkin», — delingen resmı túsiniktemede.
Buǵan deıin Qostanaı oblysynda operatsııa kezinde naýqas qaıtys bolǵany týraly jazdyq.