Qostanaı turǵyny 30 mln teńgege alaıaqtyq jasaǵany úshin sottaldy
ASTANA. KAZINFORM – Qostanaı qalasynyń №2 sotynda birneshe ret iri kólemde alaıaqtyq jasady dep aıyptalǵan jergilikti turǵynǵa qatysty qylmystyq is qaraldy. Keltirilgen shyǵyn kólemi 30 mln teńgeden asty, dep habarlaıdy Kazinform agenttiginiń tilshisi.
Sot málimetinshe, 2022 jylǵy sáýir men 2024 jylǵy qyrkúıek aralyǵynda áıel adam jyljymaıtyn múlikti tómen baǵamen satyp alýǵa járdemdesý qyzmetin kórsetemin degen jeleýmen qala turǵyndaryn aldap kelgen.
Jábirlenýshilerdiń senimine kirý úshin ol jyljymaıtyn múlikti satyp alý boıynsha zańdy mámileler jasalyp jatqandaı kórinis qalyptastyrǵan.
Onyń áreketinen segiz adam zardap shekken. Keltirilgen jalpy shyǵyn kólemi 30 mln teńgeden asty.
Sot talqylaýy barysynda sottalýshy óz kinásin tolyq moıyndap, jasaǵan isine ókinetinin aıtty. Jábirlenýshiler oǵan qatań jaza taǵaıyndaýdy jáne keltirilgen shyǵyndy óndirip berýdi surady.
Jaza taǵaıyndaý kezinde sot kináni moıyndaýyn, ókinýin, kámeletke tolmaǵan balalarynyń bolýyn, sondaı-aq aýyrlatatyn mán-jaılardyń joqtyǵyn eskerdi. Buǵan deıin áıel qylmystyq jaýapkershilikke tartylmaǵan.
Sot oǵan 4 jyl bas bostandyǵynan aıyrý jazasyn taǵaıyndady. Alaıda Qazaqstan Respýblıkasy Konstıtýtsııasynyń 30 jyldyǵyna oraı jarııalanǵan raqymshylyqqa baılanysty jaza merzimi úshten birine qysqartylyp, 2 jyl 8 aı bas bostandyǵynan aıyrý bolyp belgilendi.
Sonymen qatar kámeletke tolmaǵan balalarynyń bolýyn eskere otyryp, sot jazany óteýdi 5 jylǵa keıinge qaldyrdy.
Jábirlenýshilerdiń keltirilgen shyǵyndy óndirý týraly azamattyq talaptary tolyq kólemde qanaǵattandyryldy. Úkim zańdy kúshine engen joq.
Aıta keteıik, buǵan deıin Soltústik Qazaqstan oblysynda «droperler» jelisin uıymdastyrǵan bes turǵynnyń sottalǵany habarlanǵan edi.
