Qostanaı trassasynda alty kólik soqtyǵysty
QOSTANAI. QazAqparat - 1 mamyr kúni Qostanaı-Rýdnyı tasjolynda birden alty avtokólik soqtyǵysty, dep habarlaıdy QazAqparat oblystyq Polıtsııa departamentiniń baspasóz qyzmetine silteme jasap.
«Qostanaı-Rýdnyı avtojolynda Audi, Lada Granta, Kia, Nissan, VAZ-2114 jáne VAZ-2106 kólikteri soqtyǵysty. Aıta keterligi avtokólikterdiń barlyǵy Rýdnyı qalasyna bara jatqan. Oqıǵanyń naqty sebepteri anyqtalyp jatyr. Kólik júrgizýshileri arnaıy medıtsınalyq saraptamadan ótti. Zardap shekkender joq», - dedi vedomstvonyń baspasóz hatshysy Irına Bejenar.
Aldyn ala boljam boıynsha, kólikter joldyń nashar kórinýinen soqtyǵysýy múmkin. Sebebi, jol jıegindegi shóp janyp, aýmaqty tútin basqan.
Irına Bejenar jol-kólik oqıǵasynyń naqty sebepteri keıinirek habarlanatynyn aıtty.
