Qostanaı teatrynda kameralyq hor quryldy
Qazaq drama teatrynda «Joryqty jyldardyń jigerli jyldary» atty rekvıem jurtshylyqqa jol tartty. Teatrlanǵan qoıylym soǵys jyldarynda tyldaǵy halyqtyń shekken beınetin, olardyń jaýdy jeńýge qosqan úlesi jaıynda baıandaıdy. Maıdandaǵy jaýyngerlerdiń basynan ótken oqıǵalar sýretteledi. Qoıylym avtory - teatrdyń ádebıet bóliminiń jetekshisi, aqyn Abylaı Maýdanov. Rejısseri - Álııa Baımahan.
«Bul kúrdeli janrda qoıyp otyrǵan alǵashqy týyndym. Muny soǵys jyldary sheıit bolǵan bozdaqtar rýhyna, tylda jan aıamaı eńbek etken halyqtyń eren eńbegine jasalǵan taǵzym dese de bolady. Jeńis merekesi degen tek uran salyp, bı bılep, tegin botqa jeıtin kún emes. Bul - qasiretti kún. Halyq sony oılanýy tıis. Merekege jańa kózqaras turǵysynan qaraǵan durys. Sondyqtan bul qoıylymda jalań uran, atys-shabys joqqa tán. Ártister kórkem obrazdardy somdaǵanymen, qoıylymda tarıhı málimetter qamtylady. Jalpy, Ekinshi dúnıejúzilik soǵys jyldary 73 myńnan astam qostanaılyq maıdanǵa attanǵan. Alaıda, túrli sebeptermen nazardan tys qalǵan qaharmandar da jeterlik. Solardyń biri - bir ózi eki aıda 47 «gıtlershiniń» kózin joıǵan snaıper Sultan Erkimbaev. Erligi eskerýsiz qalǵan taǵy bir jaýjúrek Qasym Ahmetov. Ol Keńes Odaǵynyń Batyry ataǵyna usynylǵan eken. Alaıda, olar týraly málimetter 70 jyl ótken soń jaryqqa shyqty. Qoıylym barysynda bul batyrlar jaıly naqty aqparat beriledi», - deıdi Abylaı Maýdanov.
Rasymen de, basty keıipkerler Máken, Qasym, Qalamqas, Qatıra, Aqsary ana, Basqarma, Poshtashy, Komandır - jıyntyq obrazdar.
«Soǵys jyldary Qostanaı oblysyna kóshirilip ákelingen zaýyt-fabrıkalar, ushaq jasatýǵa qarjy bólgen Qabash Qozybaev, eki márte Keńes Odaǵynyń Batyry atanǵan Ivan Pavlovtardyń óshpes ónegesi qarapaıym keıipkerler aýzymen aıtylady. Sebebi, atalǵan erjúrek jerlesterimiz jaıly gazetterde jarııalanyp, kitaptarǵa engenimen, esimderi buǵan deıin teatr sahnasynan estilmegen. Osy jaǵynan kelgende, bul teatrdyń merekelik tartýy ǵana emes, tarıhqa jasaǵan taǵzymy», - deıdi І.Omarov atyndaǵy Qostanaı oblystyq qazaq drama teatrynyń bas rejısseri Álııa Baımahan.
Bul qoıylym rekvıem janrynda sahnalandy. Urys dalasyndaǵy qandy qyrǵyn, keskilesken shaıqastar etıýd, «eles-kórinis» túrinde beriledi. Tyl men maıdandaǵy oqıǵalar alma-kezek aýysyp, mahabbat, dostyq sezimi men soǵys hronıkasy rejısserlik tásildermen jetkizilgen.
Spektakldiń basty ereksheligi - qaharly jyldary aıtylǵan ánder jandy daýyspen shyrqalady.
«Búgin teatr janynan qurylǵan kameralyq hordyń resmı tusaýkeseriniń kýási boldyq. Bul trýppadaǵy ártisterdiń bári án aıtady. Aıta ketý kerek, ujymda hor ashýǵa daıyndyq ótken jyldyń sońyna taman bastalǵan bolatyn. «Ánim sen ediń» spektakli sonyń alǵashqy qadamy», - deıdi oblystyq mádenıet basqarmasynyń basshysy Erlan Qalmaqov.
Kameralyq hor quramyna shyǵarmashylyq quramnyń negizgi bóligi tartylǵan. Ártisterdi belgili mýzyka mamany Saltanat Jaqaeva jattyqtyratyn bolady.
