Qostanaı soty kisi óltirgen 94 jastaǵy ardagerge úkim shyǵardy
QOSTANAI. QazAqparat - Búgin Qostanaı oblysynyń qylmystyq ister jónindegi mamandandyrylǵan aýdanaralyq soty UOS ardageri, 94 jastaǵy Ivan Sýrkovqa úkim kesti, dep habarlaıdy QazAqparat oblystyq sottyń baspasóz qyzmetine silteme jasap.
2019 jyldyń 15 aqpanynda Qostanaı oblysynyń qylmystyq ister jónindegi mamandandyrylǵan aýdanaralyq sotynyń úkimimen 93 jasar I.V. Sýrkovqa QR QK-niń 99 baby 1 bóligi boıynsha turǵylyqty meken-jaıy boıynsha probatsııalyq baqylaý ornatýmen 7 jylǵa bostandyǵynan shekteý jazasy taǵaıyndalǵan edi. Sondaı-aq, ol psıhıatr dárigerde májbúrli túrde em alýǵa jiberildi.
Іs derekterinde kórsetilgendeı, qaıǵyly oqıǵa 2018 jyly 21 tamyzda bolǵan. I.Sýrkov óziniń baldyzy, 80 jastaǵy Nıkolaı Davydovqa gantelmen jáne pyshaqpen soqqy jasaǵan. Jábirlenýshi sol jerde til tartpaı ketti. Sotta aıtylǵandaı, ardager soǵys jyldarynda úsh ret basynan zaqym alǵan. 2016 jyly onyń úıine qaraqshylyq shabýyl jasalǵan. Osy derekterdiń bári, sot málimetinshe, aıyptalýshynyń psıhıkasyna keri áserin tıgizgen.
«Sottalǵan zeınetkerden jábirlenýshi paıdasyna 3 mln teńge kóleminde materıaldyq shyǵyn jáne moraldyq ótemaqy óteldi. Jábirlenýshi N. Davydovtyń qyzy úkimmen kelispeı, Qostanaı oblystyq sotyna apellıatsııalyq shaǵymmen júgindi. Ol óziniń dáleldemelerinde sottalýshy ardagerdiń qatygezdikpen adam óltirgenin jáne psıhıkalyq aýrý kúıinde jasaǵanyn kórsetken», - delingen oblystyq sottyń baspasóz habarlamasynda.
Qostanaı oblystyq soty qylmystyq ister jónindegi sot alqasynyń qaýlysymen QR QPK-niń 433-baby, 5-bóligi negizinde taǵaıyndalǵan jaza bóligi ózgertildi. Sot alqasy jazany jeńildetý mán-jaılardy, sottalǵannyń jasy jáne onyń qoǵamǵa qaýip tóndirý deńgeıiniń tómendigin eskerip, jazasyn maksımaldy qaýipsizdik júıesindegi qylmystyq-atqarý mekemesinde óteıdi dep sheshti. Ardager eń tómengi jaza - 4 jylǵa bas bostandyǵynan aıyryldy.
