«Qostanaı-Rýdnyı» avtojolynda jóndeý jumystary bastaldy

NUR-SULTAN. QazAqparat - «Qostanaı-Rýdnyı» ýchaskesinde jóndeý jumystary bastaldy. Ortasha jóndeý jumystary uzyndyǵy 28 shaqyrym bolatyn «Qarabutaq-Komsomol-Denısovka-Rýdnyı-Qostanaı» avtojolynyń 515-543,5 shaqyrymynda júrgiziledi, dep habarlaıdy QazAqparat QR Indýstrııa jáne ınfraqurylymdyq damý mınıstrligine silteme jasap.

Qaıta jańǵyrtý jumystary aıasynda jolshylar «Qostanaı-Rýdnyı» avtojolynyń oń jaǵynda ortasha jóndeý boıynsha aýqymdy jumystardy aıaqtady. «Dál qazir tasjoldyń sol jaǵynda jol jabyndysyn salý jumystary bastaldy.

Qazirgi ýaqytta «Qostanaı joldary» JShS merdigerlik uıymy uzyndyǵy 14 km qoldanystaǵy jol jabyndysyn frezerleý jáne uzyndyǵy 3,5 km tegisteıtin qabatty tóseý boıynsha jumystar júrgizilýde. Qurylys nysanyna 8 birlik jol-tehnıkasy men 32 adam jumyldyrylǵan» delingen habarlamada.

Bıyl ortasha jóndeý jumystary aıaqtalǵannan keıin 4 jolaqty qozǵalysy bar І sanattaǵy avtojol tolyq paıdalanýǵa beriledi.