Qostanaı polıtsııasy adam basyp óltirgen júrgizýshige izdeý saldy
QOSTANAI. QazAqparat - Qostanaı polıtsııasynyń qyzmetkerleri 35 jastaǵy er adamnyń ómiri qıylǵan jol apatynan keıin izin sýytqan júrgizýshini izdep jatyr, dep habarlaıdy QazAqparat tilshisi oblystyq ishki ister departamentiniń baspasóz qyzmetine silteme jasap.
Jol apaty 2018 jylǵy 15 shilde kúni 01:30 shamasynda Zatobol kentindegi Táýelsizdik kóshesinde, «Denta» stomatologııasynyń mańynda bolǵan.
«Jol-kólik oqıǵasynyń saldarynan er adam kóz jumdy. Al júrgizýshi oqıǵa ornynan izin sýytqan. Polıtsııa er adamdy tirkeý nómiri «8» tsıfrynan bastalatyn, 8-den keıin «0» tsıfry kelýi múmkin qara tústi «Mersedes-Bents» avtomashınasy basyp ketkenin anyqtady», - deıdi ІІD ókilderi.
Qazirgi kezde QR Qylmystyq kodeksi 345-babynyń 3-bóligi boıynsha (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) sotqa deıingi tergep-tekserý júrip jatyr.
Polıtsııa osy oqıǵaǵa qatysty qandaı da bir aqparatty biletin turǵyndardan «102» nómirine habar berýin suraıdy.
