Qostanaı polıtseıleri qaza tapqandardy bir mınýt únsizdikpen eske aldy

QOSTANAI. QazAqparat – Jalpyulttyq aza tutý kúninde Qostanaı qalasynda polıtseıler qaza tapqandardy bir mınýt únsizdikpen eske aldy, dep habarlaıdy QazAqparat tilshisi.

Sharany Qostanaı oblysy Polıtsııa departamentiniń bastyǵy Beket Aımaǵambetov ótkizdi.

«Qazaqstan Respýblıkasyndaǵy lańkestik áreket saldarynan adamdardyń qaza tabýyna baılanysty el Prezıdenti 2022 jyldyń 10 qańtaryn Jalpyulttyq aza tutý kúni dep jarııalady. Beıbit azamattardyń qaýipsizdigin qamtamasyz etý kezinde qarýlanǵan qylmyskerlerdiń qoldarynan polıtsııa qyzmetkerleri men Ulttyq ulannyń áskerı qyzmetkerleri qaza tapty. Erlik pen batyrlyq kórsete otyryp, olar ózderiniń qyzmettik jáne áskerı mindetterin oryndady. Olar týraly estelikter áriptesteri men búkil Qazaqstan halqynyń júreginde máńgi saqtalady», - dedi polıtsııa vedomstvosynyń jetekshisi.

Tártip saqshylary qazirgi kezde qylmyskerlerdi izdestirý men qamaýǵa alý maqsatynda barlyq sharalardy júzege asyryp jatyr.

Qostanaı oblysynda operatsııa bastalǵannan beri ishki ister organdaryna 700 adam jetkizildi, 281 adamǵa qatysty tótenshe jaǵdaı rejımin buzǵany úshin ákimshilik hattama toltyryldy.

Avtory: Janna Musabaeva