Qostanaı polıtseıleri anasymen ursyp qalyp, gazǵa ýlanyp ólmek bolǵan áıeldi qutqardy

QOSTANAI. QazAqparat – Qostanaı aýdanynda sýıtsıd jasaýǵa oqtalǵan áıel qutqaryldy, dep habarlaıdy QazAqparat oblystyq polıtsııa departamenti baspasóz qyzmetine silteme jasap.

«Qostanaı aýdanynda turatyn 33 jastaǵy áıel garaj ishinde tunshyqtyrǵysh gazdan ýlanyp ólmek bolǵan. Bul týraly onyń Qostanaı qalasynda turatyn anasy oblystyq PD jedel basqarý ortalyǵyna habarlaǵan. Habarlama alǵan Tobyl qalasynyń patrýldeý tobynyń leıtenanttary Amangeldi Syzdyqov pen Músilim Isabaev tıisti mekenjaıǵa bardy» delingen vedomstvo habarlamasynda.

Tártip saqshylary úıdiń aýlasyn qarap shyǵady. Sálden soń jabyq garajdan mashınanyń jumys istep turǵan qozǵaltqyshynyń dybysyn estigen. Tereze arqyly polıtseıler júrgizýshi oryndyǵynda otyrǵan áıeldi kóredi.

«Oılanýǵa ýaqyt bolmady, polıtsııa qyzmetkerleri terezeni syndyryp, gazǵa ýlanǵysy kelgen qyzdy syrtqa shyǵardy. Osy ýaqytta qyzdyń anasy oqıǵa ornyna jetip úlgerdi», - deıdi oblystyq polıtsııa departamentiniń baspasóz qyzmetindegiler.

Osylaısha der kezinde qabyldanǵan sharalardyń nátıjesinde tártip saqshylary ózine qol jumsaý áreketiniń aldyn aldy. Qyzynyń mundaı qadamǵa anasymen urysqannan keıin barǵany anyqtaldy.

Polıtsııa qyzmetkerleri eki áıelmen profılaktıkalyq áńgime ótkizip, úılerine apardy. Aman qalǵan áıeldiń anasy Valentına Alekseevna tártip saqshylary Amangeldi Syzdyqov pen Múslim Isabaevtyń atyna alǵys hat jazdy.