Qostanaı ózenderindegi muzdy jarýǵa 4 tonna jarylǵysh qoldanyldy
QOSTANAI. QazAqparat – Qostanaı oblysynyń ákimi Arhımed Muhambetov óńirlerge jumys sapary barysynda sý tasqynyna daıyndyq barysymen tanysty, dep habarlaıdy QazAqparat.
Arhımed Muhambetov Áýlıekól aýdanynyń Amanqaraǵaı aýylyndaǵy 320 oryndy memlekettik tilde oqytatyn jalpy bilim beretin orta mektep qurylysynyń barysyn qarap shyqty. Jobanyń jalpy somasy 1,1 mlrd teńgeni quraıdy, ony 2020 jyldyń tamyz aıynda paıdalanýǵa berý josparlanýda.
«Sonymen qatar, Áýlıekól aýdanyndaǵy sý tasqyny kezeńine daıyndyq barysymen tanystym. Aýdan ákimi E. Temenov eldi mekenderdi jáne sý ótkizý qubyrlaryn qardan tazalaý boıynsha júrgizilip jatqan jumystar týraly baıandady. Odan ári Qarasý aýdanynyń sý tasqynyna qarsy daıyndyǵymen tanystym. Zelenov aýylynda muzdy qopsytý boıynsha jarylys jumystaryn júrgizý ornyn qarap shyqtym. Al Qarasý aýylynda qar shyǵarý jumystaryn nazarǵa aldy. Qysta aýdannyń eldi mekenderinen 59,3 myń tekshe metrden astam qar shyǵaryldy. Sondaı-aq Qarasý ózenindegi jarylys jumystaryn baqyladym», - dep jazdy óńir basshysy jelidegi paraqshasynda .
Oblys ákimi ózenderdegi jarylys jumystaryn júrgizý jumystaryn baqylady.
«Muz jarý ózenderdegi sel keptelisin boldyrmaıdy, eldi mekenderdi sý basý qaýpin tómendetedi. Jalpy, bıyl óńirdegi ózenderinde 15 muz jarylysy ótkizildi, 4 tonnadan astam jarylǵysh zat qoldanyldy. Y.Altynsarın jáne Qamysty aýdandarynda jarylys jumystaryn júrgizý josparlanǵan», - dedi Arhımed Muhambetov.
Sapar sońynda aımaq basshysy Qarasý aýdanynda pandemııaǵa qarsy júrgizilip jatqan is-sharalarmen tanysty. Áýlıekól jáne Qarasý aýdandarynyń ákimderine óńirlerdiń sý tasqyny jaǵdaıyna turaqty túrde monıtorıng júrgizýdi tapsyrdy.
