Qostanaı ortalyǵynda «Aýdı» janyp ketti
QOSTANAI. QazAqparat - Qostanaıda saýda ortalyǵynyń janynda turǵan «Aýdı» markaly avtokólik órtenip ketti, dep habarlaıdy QazAqparat tilshisi.
Oqıǵa Abaı kóshesindegi «Emshan» saýda ortalyǵynyń mańynda bolǵan. Kýágerlerdiń aıtýynsha, toqtap turǵan kólikten tútin bilinip, sálden keıin órt shyqqan. Olar birden órt sóndirýshilerdi shaqyrdy.
Qostanaı oblysy TJD baspasóz hatshysy Merýert Balǵınanyń sózinshe, qyzyl jalyn 2 sharshy metr aýmaqty qamtyǵan.
«Búgin Abaı kóshesindegi 34-úıdiń qasynda turǵan «Aýdı-80» markaly kólik janyp ketti. Aldymen, mashınanyń qozǵaltqysh bóligi tutanǵan. Órt saǵat 14:07-de tolyqtaı sóndirildi», - dep habarlady Balǵına agenttik tilshisine.
Órttiń shyǵý sebepteri anyqtalyp jatyr. Zardap shekkender joq.
