Qostanaı ormandary jyl basynan 17 ret órtendi
QOSTANAI. QazAqparat - Qostanaı oblysynda orman órti kóbeıdi. Bul týraly oblystyq Tótenshe jaǵdaılar departamentinde ótken brıfıngte aıtyldy, dep habarlaıdy QazAqparat tilshisi.
Oblystyq TJD bastyǵynyń orynbasary Azamat Orynbaevtyń aıtýynsha, Qostanaı oblysy memlekettik orman qory aýmaǵynda 17 orman órti tirkelgen. Bul ótken jylmen salystyrǵanda, 70% kóp. Órt sharpyǵan alqap 8118,31 gektardy qamtydy.
«Aǵymdaǵy jyly 1304 gektar dala alqaby órtendi. Ol 859,6 ga aýmaqqa teń. Tabıǵı órtterdiń negizgi sebepteri adam faktorlarynan bolyp otyr. Ásirese, shabyndyq pen saban, turmystyq qaldyqtar men qoqystardyń baqylaýsyz janýy kóbirek kezdesedi. Jaz mezgilinde eldi mekenderde, baý-baqshalarda órtke qarsy tártip pen qosymsha sharalar qabyldanýy kerek. Ot jaǵý, qaldyqtardy órteý arnaıy oryndarda adamdardyń baqylaýymen 50 metrden kem emes araqashyqtyqta júzege asyrylady», - dedi departament qyzmetkeri.
Qazirgi kezde órt sóndirýshiler orman qyzmetkerlerine orman alqaptarynda eskertý reıdterin ótkizýge kómektesedi. Týrısterge túsindirý jumystary júrgizilip, jadynamalar taratylady. Qazirdiń ózinde zań buzǵandarǵa 4 ákimshilik hattama toltyrdy.
Aıta keteıik, jeke tulǵalar úshin ormandarda ot jaǵyp, mangalda kómir tutatqandarǵa 5-ten 10 AEK-ke deıin aıyppul salynady.
